ԵՐԵՎԱՆ, 13 ՄԱՅԻՍԻ, ԱՐՄԵՆՊՐԵՍ։ ԵՊՀ գիտական խորհրդի նիստերի դահլիճում ընթանում է «Հետադարձ հայացք գցելով և շարժվելով առաջ. ԵՄ-ն և ժողովրդավարության աջակցությունը մասնատված և խնդրահարույց հարևանությունում» խորագրով միջազգային գիտաժողովը։
«Արմենպրես»-ի փոխանցմամբ՝ այն կազմակերպվել է ԵՊՀ եվրոպական ուսումնասիրությունների կենտրոնի նախաձեռնությամբ Հորիզոն Եվրոպա «ԵՄ ժողովրդավարության աջակցության վերակարգավորումը․ դեպի կայուն ժողովրդավարություն Արևելյան հարևանությունում» (REDEMOS) ծրագրի շրջանակում։
Միջոցառման օրակարգում է Արևելյան հարևանության երկրներում ԵՄ ժողովրդավարության աջակցության հիմնահարցերի քննարկումը։ Գիտաժողովի մասնակից փորձագետները կկիսվեն իրենց տեսակետներով Հայաստանի ժողովրդավարական փոխակերպումների, ավտորիտար սպառնալիքների և տարածաշրջանային ռիսկերի վերաբերյալ:
Գիտաժողովի մասնակիցներին ողջունել է ԵՊՀ ռեկտոր Հովհաննես Հովհաննիսյանը՝ կարևորելով նման կարևոր թեմաների քննարկումը և միջոցառումների անցկացումը համալսարանում։
Զեկուցմամբ հանդես է եկել Հայաստանում ԵՄ պատվիրակության ղեկավար, դեսպան Վասիլիս Մարագոսը։
Միջոցառմանը ներկա են ՀՀ-ում արտակարգ և լիազոր դեսպաններ, միջազգային կառույցների և կազմակերպությունների ղեկավարներ, ներկայացուցիչներ, ԵՊՀ դասախոսներ, ուսանողներ։