Հասարակական

ԼՂ-ից բռնի տեղահանվածներին 50 հազար դրամի չափով աջակցության համար դիմելու ժամկետը կերկարաձգվի

2 րոպեի ընթերցում

ԼՂ-ից բռնի տեղահանվածներին 50 հազար դրամի չափով աջակցության համար դիմելու ժամկետը կերկարաձգվի

ԵՐԵՎԱՆ, 19 ԴԵԿՏԵՄԲԵՐԻ, ԱՐՄԵՆՊՐԵՍ։ ՀՀ աշխատանքի և սոցիալական հարցերի նախարարությունը փոփոխություններ է նախաձեռնել Լեռնային Ղարաբաղից բռնի տեղահանված անձանց 50 հազար դրամի չափով աջակցության վերաբերյալ ՀՀ կառավարության որոշման մեջ, որը քննարկման կներկայացվի առաջիկա նիստում։

«Արմենպրես»-իհաղորդմամբ՝ այս մասին դեկտեմբերի 19-ին «Հումանիտար կենտրոն»-ում կայացած ասուլիսին տեղեկացրել է ՀՀ աշխատանքի և սոցիալական հարցերի նախարարի տեղակալ Աննա Ժամակոչյանը՝ անդրադառնալով այն խնդրին, որ ըստ գործող որոշման 50 հազար դրամի չափով աջակցությունից համար չէին կարող դիմել այն անձինք, ովքեր դեռ չեն ստացել 100 հազար դրամ միանվագ օգնությունը։

«Դեկտեմբերի 15-ի դրությամբ ընդունել ենք բոլորի դիմումները, ովքեր ներկայացրել են, անկախ նրանից, տվյալ պահին իրենք հանդիսացել են 100 հազարների շահառու, թե ոչ՝ հետագա մշակման նպատակով»,-հայտնել է նա։

Փոխնախարարի խոսքով՝ հինգշաբթի օրը կառավարության նիստին կներկայացվեն նախարարության նախաձեռնած փոփոխությունները, որոնց համաձայն նախատեսվում է գործող որոշման մեջ ամրագրել փոփոխություն, որը հնարավորություն կընձեռի 50 հազար դրամ աջակցության համար դիմելն ապահովել մինչև 2024 թվականի հունվարի վերջը։

«Բոլոր այն դեպքերում, երբ դեռևս կան որոշակի պոտենցիալ շահառուներ, նրանք հնարավորություն կստանան կրկին առաջիկայում դիմելու և այդ հնարավորությունը կպահպանվի մինչև հունվարի 30-ը»,-պարզաբանել է Ժամակոչյանը։

AREMNPRESS

Հայաստան, Երևան, 0002, Մարտիրոս Սարյան 22

+374 11 539818

contact@armenpress.am

fbtelegramyoutubexinstagramtiktokspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2024 ARMENPRESS

Ստեղծվել է՝ MATEMAT-ում