387.58
Լաչինի այլընտրանքային ճանապարհի կառուցումը կավարտվի մինչև գարուն. նախարար
1 րոպեի ընթերցում
ԵՐԵՎԱՆ, 4 ՕԳՈՍՏՈՍԻ, ԱՐՄԵՆՊՐԵՍ: Լաչինի այլընտրանքային ճանապարհի շինարարական աշխատանքները սկսված են, կավարտվեն մինչև գարուն: «Արմենպրես»-ի հաղորդմամբ՝ այս մասին ասել է ՀՀ տարածքային կառավարման և ենթակառուցվածքների նախարար Գնել Սանոսյանը լրագրողների հետ զրույցում:
«Շինարարությունը սկսել ենք, տեխնիկաները աշխատում են, ճանապարհը կառուցում են»,-ասաց Սանոսյանը:
Իսկ, թե աշխատանքները երբ կավարտվեն՝ նախարարն ասաց. «Մինչև գարուն»:
Սանոսյանի վստահեցմամբ՝ ակտիվ աշխատում են այդ ուղղությամբ:
2020 թվականի նոյեմբերի 9-ի եռակողմ հայտարարության 6-րդ կետով սահմանվել էր, որ կողմերի համաձայնությամբ, առաջիկա երեք տարիների ընթացքում կորոշվի Լաչինի միջանցքի երկայնքով նոր երթուղու կառուցման նախագիծ, որը կապահովի կապը Լեռնային Ղարաբաղի և Հայաստանի միջև, հետագայում այդ երթուղին պաշտպանելու համար ռուսական խաղաղապահ զորախմբը կտեղափոխվի այնտեղ:
