Էլեկտրոնային եղանակով տրվել է 1010 շինթույլտվություն

ԵՐԵՎԱՆ, 1 ՀՈՒՆԻՍԻ, ԱՐՄԵՆՊՐԵՍ: Հայաստանում աշխատանքներ են տարվում՝ ողջ հանրապետությունում շինթույլտվությունների էլեկտրոնային համակարգի ներդրման ուղղությամբ: «Արմենպրես»-ի հաղորդմամբ՝ այս մասին ասաց Քաղաքաշինության կոմիտեի ղեկավար Արմեն Ղուլարյանը ԱԺ հանձնաժողովների համատեղ նիստում «Հայաստանի Հանրապետության 2021թ. պետական բյուջեի կատարման մասին» տարեկան հաշվետվության քննարկմանը:

Նա նախ հիշեցրեց, որ 2021-ի դեկտեմբերի 2-ին կառավարության որոշման մեջ փոփոխությունների մասին որոշում է ընդունվել, որի համաձայն հանրապետությունում սահմանվել են 4 համայնքներ՝ Կոտայքի մարզի Նաիրի, Արմավիրի մարզի Էջմիածին, Արարատի մարզի Մասիս և Լոռու մարզի Վանաձոր համայնքները, որտեղ շինթույլտվությունները տրամադրվում են բացառապես էլեկտրոնային ընթացակարգերով:

« 2022-ի հունիսի 1-ի դրությամբ համակարգի միջոցով նշված 4 համայնքներում ստացվել է շուրջ 1640 դիմում, արդեն մենք կարողացել ենք տրամադրել 1010 թույլտվություն: Դա խոսում է այն մասին, որ էլեկտրոնային շինթույլտվությունների համակարգի ներդրումը, տարածումը ամբողջ հանրապետությունում խիստ օրախնդիր հարց է, որի ուղղությամբ մենք աշխատում ենք»,-ասաց Ղուլարյանը: