Երանոսում ընթանում են ճանապարհաշինական աշխատանքներ

ԳԱՎԱՌ, 10 ՕԳՈՍՏՈՍԻ, ԱՐՄԵՆՊՐԵՍ։ Գեղարքունիքի մարզի Երանոս համայնքում արդեն 10 օր է, ինչ սկսվել եւ ընթանում են մի շարք փողոցների ասֆալտապատման աշխատանքները։

Ինչպես «Արմենպրես»-ին տեղեկացրեց Երանոս համայնքի ղեկավար Սաշա Բավեյանը, ճանապարհաշինական ծրագիրն իրականացվում է ՀՀ կառավարության կողմից իրականացվող սուբվենցիոն ծրագրերի շրջանակներում։ Ծրագրի պայմանագրային արժեքը կազմում է 44 միլիոն 725 հազար դրամ, որի 45 տոկոսը կամ 20 միլիոն 126 հազար դրամը հատկացնում է ՀՀ կառավարությունը, 55 տոկոսը կամ 24 միլիոն 599 հազար դրամը՝ Երանոսի համայնքապետարանը։

Նախատեսված է ասֆալտապատման աշխատանքներ իրականացնել 700 գծամետր երկարությամբ եւ 3500 քառակուսի մետր մակերեսով։ «Օգոստոսի 10-ի դրությամբ շինարարությունն արդեն իրականացվել է մոտ 90 տոկոսով։ Ավարտվել են հողային ու խճապատման աշխատանքները, տեղադրվել է ասֆալտբետոնյա շերտը։ Մնում է ջրահեռացման առուների տեղադրումը, որը կավարտվի առաջիկա մի քանի օրերի ընթացքում։

Կենսական կարեւոր նշանակություն ունեցող ծրագրի իրականացման արդյունքում Երանոսի մի շարք փողոցների բնակիչներ ունենում են միանգամայն բարեկարգ ու ասֆալտապատ փողոցներ»,-ներկայացրեց Սաշա Բավեյանը։

Խոսրով Խլղաթյան