398.88
Նախարարությունը կշարունակի մարդկանց կամովին պատվաստման քաղաքականությունը
2 րոպեի ընթերցում
ԵՐԵՎԱՆ, 9 ՀՈՒԼԻՍԻ, ԱՐՄԵՆՊՐԵՍ: ՀՀ առողջապահության նախարարի պաշտոնակատար Անահիտ Ավանեսյանը վստահեցնում է, որ նախարարությունը շարունակելու է մարդկանց կամովին պատվաստման քաղաքականությունը:
«Արմենպրես»-ի հաղորդմամբ՝ այս մասին նա ասաց հուլիսի 9-ին լրագրողների հետ հանդիպմանը:
«Հայաստանում պատվաստումների ցուցանիշները գոհացուցիչ չեն, բայց գոհացուցիչ է այն աճման տեմպը, որը մենք նկատում ենք: Խորհրդարանական ընտրություններից հետո այդ տեմպը շեշտակի աճել է»,- նշեց նա:
Ըստ Ավանեսյանի՝ պատվաստումների նկատմամբ վստահության պակասը պայմանավորված է եղել հակապատվաստումային քարոզչությամբ, կեղծ տեղեկատվության կայծակնային տարածմամբ և այլ գործոններով:
«Բոլոր երկրներում էլ ժամանակ է պահանջվում, որ հասարակությանը ինֆորմացիա տրամադրվի այն մասին, թե ինչ պատվաստանյութեր կան, ինչ ազդեցություն ունեն և այլն: Մեր քաղաքականությունը մշակելիս գնացինք կրթելու, ճշգրիտ ինֆորմացիա փոխանցելու և պատվաստման գործընթացի կարևորությունը մարդկանց հասցնելու ճանապարհով: Կարող եմ ասել, որ արդեն իսկ նկատում ենք դրա պտուղները»,-շեշտեց նախարարի պաշտոնակատարը:
Ավանեսյանը նշեց, որ վերջին ամիսներին Հայաստանում հակահամաճարակային իրավիճակը բարվոք է, և դա է պատճառը, որ սահմանափակումները խիստ չեն: Մարդիկ կարող են հանգիստ այցելել ժամանցի վայրեր: Ավանեսյանը կարծում է, որ դա փոքրացնում է քայլ անելու և կանխարգելիչ գործողություն իրականացնելու, առողջ լինելու մոտիվացիան, սակայն իրենք շարունակելու են մարդկանց կամովին պատվաստման բերելու քաղաքականությունը, որը ժամանակ է պահանջում:
Բաժանորդագրվեք մեր ալիքին Telegram-ում