Ժամանակը Երևանում՝ 11:07:36,   28 Սեպտեմբեր

ՌԴ Դաշնային խորհրդի անդամը հայտարարել է, որ Հայաստանում կայացած ընտրություններն անցել են երկրի օրենսդրությանը համապատասխան

ՌԴ Դաշնային խորհրդի անդամը հայտարարել է, որ Հայաստանում կայացած ընտրություններն անցել են երկրի օրենսդրությանը համապատասխան

ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ: Հայաստանում կայացած արտահերթ խորհրդարանական ընտրություններն անցել են երկրի ազգային օրենսդրությանը և միջազգային չափանիշների համապատասխան, իսկ դիտորդների կողմից արձանագրված ոչ նշանակալի խախտումները չէին  կարող ազդել քվեարկության արդյունքների վրա: Ինչպես հաղորդում է «Արմենպրես»-ը, վկայակոչելով ՏԱՍՍ-ը, այս մասին ասել է ՌԴ դաշնային խորհրդի անդամ Վիկտոր Սմիրնովը:

«Հայաստանի Ազգային ժողովի ընտրություններն անցել են երկրի ազգային օրենսդրության և միջազգային չափանիշների համապատասխան: Այն ոչ նշանակալի խախտումները, որոնք արձանագրել են միջազգային դիտորդները, տեխնիկական բնույթ են կրել և, անկասկած, չէին կարող ազդել քվեարկության արդյունքների վրա»,- ասել է Սմիրնովը:

Նա ասել է, որ քվեարկության օրն անձամբ այցելել է 17 ընտրական տեղամաս, իսկ ընդհանուր առմամբ ԱՊՀ խորհրդարանական վեհաժողովի դիտորդների խումբը եղել է Հայաստանի մայրաքաղաքի և մարզերի 77 ընտրական տեղամասում: Խորհրդարանականի խոսքով՝ սենատորները հանդիպել են նաև Հայաստանի կենտրոնական ընտրական հանձնաժողովի ղեկավարության, մի շարք քաղաքական կուսակցությունների և ընտրական դաշինքների ներկայացուցիչների հետ:

«Քվեարկությանը օրը դրսևորվեց տեղամասային ընտրական հանձնաժողովների և Կենտրոնական ընտրական հանձնաժողովի պրոֆեսիոնալիզմը: Ամենուր, որտեղ մենք եղել ենք, կազմակերպված աշխատանք է իրականացվել, ճշգրիտ կերպով իրացվել է հանրապետության ընտրական օրենսդրությունը»,- նշել է Սմիրնովը:

Նա նաև հավելել է, որ այն ընտրական տեղամասերում, որտեղ իրենք եղել են, ընտրողների բարձր ակտիվություն է եղել, պահվել են երկրում գործող հակահամաճարակային կանոնները՝ կապված կորոնավիրուսի համավարակի հետ:








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]