ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: ՀՀ ԿԳՄՍ նախարարության աջակցությամբ մայիսի 30-ից հունիսի 15-ը Երևանում, Գյումրիում և Արտաշատում կանցկացվի «Արմմոնո» 19-րդ միջազգային թատերական փառատոնը։
«Արմենպրես»-ի մամուլի սրահում հրավիրված ասուլիսում «Արմմոնո» միջազգային թատերական փառատոնի տնօրեն Մարիաննա Մխիթարյանը նշեց, որ հնադիսատեսը հնարավորություն է ունենալու դիտել 20-ից ավելի ներկայացում:
«Թատերական փառատոնի թիրախում մեր մարզային թատրոններն են: Այդ իսկ պատճառով փառատոնի մեկնարկը տրվելու է Գավառի դրամատիկական թատրոնի գլխավոր ռեժիսորի բեմադրությամբ: Ծրագիրը բավական հագեցած է, երկու տասնյակից ավելի ներկայացումներ են լինելու»,-ասաց Մարիաննա Մխիթարյանը՝ ընդգծելով, որ «Արմմոնո»-ն տարեցտարի ընդլայնում է իր շրջանակները՝ ի հայտ բերելով նոր անուններ:
Փառատոնի բացումը տեղի է ունենալու Թատերական գործիչների միությունում մայիսի 30-ին «Կարմիր ծաղիկ» ներկայացմամբ, որի բեմադրության հեղինակը Գեղարքունիքի մարզի Լ. Քալանթարի անվան դրամատիկական թատրոնի գլխավոր ռեժիսոր Արմեն Սաֆարյանն է:
«Դերակատարը Լաուրա Ստեփանյանն է: Շատ փակագծեր չեմ ցանկանում բացել, սակայն կնշեմ, որ շոշափվել են թեմաներ, խնդիրներ, որոնք մեր կյանքում անհանգստացնող են: Ցանկանում ենք հասարակության ուշադրությունը հրավիրել դրանց վրա: Շատ եմ կարևորում նման փառատոններին մասնակցելը: Արդեն 4-րդ անգամ եմ մասնակցում: Այն ինձ տալիս է փորձ, համագործակցության հնարավորություն, ընկերներ՝ աշխարհի տարբեր երկրներում»,- ասաց Արմեն Սաֆարյանը:
Դերասանուհի Լաուրա Ստեփանյանն առաջին անգամ է մասնակցում «Արմմոնո» միջազգային փառատոնին, թեպետ, նախորդ տարիներին հետևել ու դիտել է բոլոր ներկայացումները: Այսօր, իր ուժերն առաջին անգամ փորձելով մոնոներկայացումում, ինչպես ինքն է ասում, արդեն դարձել է «Արմմոնո» միջազգային փառատոնի ընտանիքի մասը:
«Շատ ուրախ եմ, որ այս հնարավորությունը տրվեց: Ես առհասարակ չեմ խաղացել մոնոներկայացում, և սա ինձ համար լրիվ ուրիշ աշխարհ է: Փառատոնին մասնակցությունն էլ առաջինն է ու շատ սպասում եմ ներկայացման օրվան: Ներկայացումը մեր կյանքի մասին է, կյանքում տեղ գտած արատավոր երևույթների, որոնք շատ դեպքերում մարդկանց տանում են կործանման: Գլխավոր ուղերձն այն է, որ մարդիկ կանգ առնեն և հեռու մնան կործանարար քայլերից»,- ասաց Լաուրա Ստեփանյանը: