388.78
Տարածաշրջանում անհնար է ապահովել կայունություն առանց Արցախյան հիմնախնդրի արդար կարգավորման. Արմեն Սարգսյան
3 րոպեի ընթերցում
ԵՐԵՎԱՆ, 15 ԱՊՐԻԼԻ, ԱՐՄԵՆՊՐԵՍ: Հայաստանը մեծ կարևորություն է տալիս հարևան Վրաստանի հետ բարեկամությանն ու համագործակցությանը: Ինչպես հաղորդում է «Արմենպրես»-ը, այս մասին Թբիլիսիում Վրաստանի նախագահ Սալոմե Զուրաբիշվիլիի հետ հանդիպման արդյունքներով հայտարարեց Հայաստանի նախագահ Արմեն Սարգսյանը՝ ընդգծելով, որ հայ-վրացական հարաբերություններն ունեն դարերի պատմություն:
«Կարող եմ վստահորեն նշել, որ Վրաստանի հետ մեր հարաբերությունների ամրապնդումն ինչպես մեր երկրների, այնպես էլ տարածաշրջանի անվտանգության և զարգացման կարևոր նախադրյալներից մեկն է»,- նշեց Սարգսյանը:
Նա հայտնեց, որ Վրաստանի գործընկերոջ հետ քննարկել են օրակարգային հարցերի լայն շրջանակ՝ անդրադառնալով տրանսպորտի, էներգետիկայի, զբոսաշրջության, գյուղատնտեսության, կրթության ու մշակույթի և այլ ոլորտներին: ՀՀ նախագահի խոսքով՝ համագործակցության մեծ ներուժ կա ժամանակակից տեխնոլոգիաների, արհեստական բանականության, կենսատեխնոլոգիների, կիբերանվտանգության, պարենային անվտանգության ոլորտներում:
«Անդրադարձանք նաև տարածաշրջանային անվտանգության և կայունությանապահովման հարցերին՝ հաշվի առնելով Հայաստանի դեպքում Լեռնային Ղարաբաղի դեմ Թուրքիայի ակտիվ ու բացահայտ աջակցությամբ Ադրբեջանի իրականացրած ռազմական ագրեսիայի արդյունքում ստեղծված նոր իրողությունները։
Ես իմ վրացի գործընկերոջը ներկայացրեցի ԼՂ հարցում հայկական կողմի մոտեցումներն ու տեսակետները: Հատուկ ընդգծեցի, որ տարածաշրջանում անհնար է հաստատել տևական խաղաղություն և ապահովել կայունություն առանց նաև Արցախյան հիմնախնդրի արդար կարգավորման: Այդ թվում նշեցի նաև ԵԱՀԿ Մինսկի խմբի համանախագահության շրջանակներում հակամարտության խաղաղ կարգավորման գործընթացիվերսկսման հնարավորությունն ու դրա անհրաժեշտությունը: Շեշտեցի պատերազմի հետևանքով առաջացած հսկայական մարդասիրական խնդիրները, այդ թվում՝ Ադրբեջանի կողմից գերիներին և պատանդներին, կամ այն անձանց, ովքեր այդպիսի կարգավիճակ ունեն, նրանց ազատ արձակման հարցում շուտափույթ լուծում գտնելու անհրաժեշտությունը։ Սա շատ էական խնդիր է, և սա հումանիտար խնդիր է»,- հայտարարեց Արմեն Սարգսյանը:
Նա ընդգծեց, որ անթույլատրելի է պատերազմից հետո ստեղծված իրավիճակն Ադրբեջանի կողմից շահարկելը, ազգային արժանապատվության ոտնահարման քաղաքականություն վարելը: «Այս քաղաքականությունը չի կարող նպաստել երկխոսության մթնոլորտի ձևավորմանը»,- ասաց նա՝ մտահոգություն հայտնելով նաև ադրբեջանական վերահսկողության ներքո հայտնված տարածքներում հայկական պատմամշակութային և հոգևոր ժառանգության պահպանության հարցով։
Ելույթի վերջում շնորհակալություն հայտնելով Սալոմե Զուրաբիշվիլիին ջերմ ընդունելության համար՝ նա հույս հայտնեց վրաց գործընկերոջն առաջիկայում տեսնել Հայաստանում:
