ოპოზიცია ცდილობს ჩაშალოს TRIPP-ის პროექტი და აზერბაიჯანთან სამშვიდობო შეთანხმების ხელმოწერა - ართურ ჰოვჰანისიანი

საპარლამენტო ოპოზიცია ცდილობს ჩაშალოს პროექტ TRIPP-ის განხორციელება და აზერბაიჯანთან სამშვიდობო შეთანხმების ხელმოწერა.

„არმენპრესის“ ცნობით, ეს თვალსაზრისი ფრაქცია „სამოქალაქო ხელშეკრულების“ დეპუტატმა ართურ ჰოვჰანისიანმა ეროვნული ასამბლეის ოთხდღიანი სხდომების შემაჯამებელ ბრიფინგზე გამოთქვა, რითაც გამოეხმაურა ფრაქცია „ძლიერი სომხეთის“ წარმომადგენელთა მტკიცებას, რომ TRIPP-ის პროექტის განხორციელებისა და სამშვიდობო შეთანხმების ხელმოწერისთვის ერთზე მეტი გარანტორია საჭირო.

„შთაბეჭდილება არ შეიქმნას, თითქოს ოპოზიცია გარანტორების აუცილებლობაზე საუბრით TRIPP-ის პროექტის ან პარაფირებული სამშვიდობო შეთანხმების გაუმჯობესებას ცდილობს. ოპოზიცია ცდილობს ჩაშალოს TRIPP-ის პროექტის განხორციელება და სამშვიდობო შეთანხმების ხელმოწერა. სომხეთის გარე გავლენის დამოკიდებულებაში დაბრუნების ერთადერთი გზა TRIPP-ისა და სამშვიდობო პროცესის ჩაშლაა. ჩვენ გვესმის, რის მიღწევას ცდილობს ოპოზიცია. ამ საკითხებზე ოპოზიციის დაკვირვებები და კომენტარები უბრალოდ კვამლის ფარდაა იმისთვის, რისი განხორციელებაც სურთ. მათ სურთ სომხეთის დამოუკიდებლობის ჩაშლა, ჩვენ ამის უფლებას არ მივცემთ“, — განაცხადა მმართველი ძალის წარმომადგენელმა.

28 ოქტომბერს ეროვნული ასამბლეის პლენარულ სხდომაზე 63 მომხრე ხმით მოხდა სომხეთსა და ამერიკის შეერთებულ შტატებს შორის პროექტის „ტრამპის გზა საერთაშორისო მშვიდობისა და კეთილდღეობისთვის“ (TRIPP) შესახებ სტრატეგიული თანამშრომლობის ჩარჩო შეთანხმების რატიფიცირება. რატიფიცირებას მხარი მხოლოდ მმართველი ფრაქცია „სამოქალაქო ხელშეკრულების“ დეპუტატებმა დაუჭირეს.

შეთანხმებით გათვალისწინებულია „TRIPP-ის განვითარების კომპანიის“ შექმნა, რომლის წილის 26 პროცენტი სომხეთს ეკუთვნის, 74 პროცენტი კი, ამერიკულ მხარეს. საწყისი ვადა 49 წელია. მხარეთა ორმხრივი შეთანხმებით თანამშრომლობის კიდევ 50 წლით გაგრძელების შემთხვევაში, სომხეთის წილი 49 პროცენტამდე გაიზრდება, ხოლო ამერიკული მხარისა 51 პროცენტი იქნება.