სომხეთის პარლამენტის თავმჯდომარემ სომხეთის უსაფრთხოების ძირითადი საფრთხეების შესახებ საკუთარი შეფასება წარადგინა

სომხეთის უსაფრთხოების საფრთხეებს შორის არის აზერბაიჯანთან მშვიდობის ჯერ კიდევ შეუქცევადი და სრულად ინსტიტუციონალიზებული არყოფნა, თურქეთთან ჩაკეტილი საზღვარი და დიპლომატიური ურთიერთობების არარსებობა, ასევე ეკონომიკური, უსაფრთხოებისა და ენერგეტიკული კავშირების არასაკმარისი დივერსიფიკაცია.

„არმენპრესის“ ცნობით, ამის შესახებ ეროვნულ ასამბლეაში პარლამენტის თავმჯდომარემ რუბენ რუბინიანმა განაცხადა - ფრაქცია „სომხეთის“ დეპუტატ ქრისტინე ვარდანიანის გამოსვლასა და სომხეთის წინაშე არსებული საფრთხეების წყაროებთან დაკავშირებით მის შეკითხვაზე საპასუხოდ.

„ჩვენი საფრთხეები მომდინარეობს, პირველ რიგში, აზერბაიჯანიდან. აზერბაიჯანთან ჩვენ გვაქვს მშვიდობა, თუმცა ეს მშვიდობა ჯერ კიდევ არ არის შეუქცევადი და საბოლოოდ ინსტიტუციონალიზებული. ესე იგი, აზერბაიჯანთან სრულფასოვანი მშვიდობის არარსებობა ცალსახად და უპირობოდ წარმოადგენს საფრთხეს სომხეთის რესპუბლიკის უსაფრთხოებისთვის“,-  განაცხადა რუბინიანმა.

მისი თქმით, საფრთხეს წარმოადგენს თურქეთთან საზღვრის ჩაკეტვა და ორ ქვეყანას შორის დიპლომატიური ურთიერთობების არარსებობაც.

„ჩვენ გვაქვს საფრთხე თურქეთის მხრიდან, ვინაიდან უშუალო მეზობელთან ჩაკეტილი საზღვრის ქონა სულ მცირე ეკონომიკური საფრთხეა, ხოლო დამყარებული დიპლომატიური ურთიერთობების არქონა - სულ მცირე დიპლომატიური საფრთხე“, - აღნიშნა პარლამენტის თავმჯდომარემ.

რუბინიანმა სავარაუდო საფრთხეთა რიგში ასევე შეიყვანა სომხეთის ეკონომიკური და უსაფრთხოების კავშირების, ენერგეტიკული რესურსების წყაროებისა და სატრანზიტო გზების არასაკმარისად დივერსიფიცირებული მდგომარეობა.

მისი თქმით, ხელისუფლებისა და ოპოზიციის მიდგომებს შორის განსხვავება იმაში მდგომარეობს, რომ ხელისუფლება ცდილობს დაფიქსირებული საფრთხეების განეიტრალებასა და მათთვის გადაჭრის გზების მოძებნას.

„ჩვენ ვხედავთ საფრთხეს და გვსურს მისი აღმოფხვრა ან განეიტრალება. დავინახეთ, რომ მშვიდობა არ არის - მივაღწიეთ მშვიდობას. ახლა ვხედავთ, რომ ის ჯერ კიდევ არ არის შეუქცევადი და ასი პროცენტით ინსტიტუციონალიზებული, და გვსურს იგი გავახდინოთ შეუქცევადი და მოვახდინოთ მისი ინსტიტუციონალიზება“, - განაცხადა რუბინიანმა.

სომხეთ-თურქეთის ურთიერთობებს შეეხო რა, მან აღნიშნა, რომ სომხური მხარე მოლაპარაკებების გზით ცდილობს მიაღწიოს საზღვრის გახსნასა და ურთიერთობების მოწესრიგებას.

„ვხედავთ თურქეთთან ჩაკეტილ საზღვარს, ვხედავთ, რომ ეს საფრთხეა ჩვენი ეკონომიკური აგენტებისა და ზოგადად სომხეთისთვის. ვწარმოებთ მოლაპარაკებებს, რათა რაიმე გადაწყვეტამდე მივიდეთ, და ამ პროცესში ნაბიჯ-ნაბიჯ მივდივართ წინ“, - გაუსვა ხაზი პარლამენტის თავმჯდომარემ.

რუბინიანმა გააკრიტიკა „სომხეთის რევოლუციური ფედერაციის“ (დაშნაკცუთიუნის) პოლიტიკური მიდგომა - ამტკიცებდა რა, რომ პარტია ცდილობს არა საფრთხეების განეიტრალებას, არამედ მათ პოლიტიკურ ექსპლუატაციას.

რუბინიანის თქმით, სომხეთში ყველას აქვს გაცნობიერებული, რომ თურქეთთან მოუწესრიგებელი ურთიერთობები და აზერბაიჯანთან საბოლოოდ ინსტიტუციონალიზებული მშვიდობის არარსებობა საფრთხეებს წარმოადგენს.

„სომხეთში არ არის ადამიანი, რომელმაც არ იცოდეს, რომ თურქეთთან მოუწესრიგებელი ურთიერთობები საფრთხეა, ან არ იცოდეს, რომ აზერბაიჯანთან საბოლოოდ ინსტიტუციონალიზებული მშვიდობის არარსებობა საფრთხეა“, - განაცხადა პარლამენტის თავმჯდომარემ.

იგი ასევე შეეხო რუსეთის მიერ სომხური პროდუქციის იმპორტზე დაწესებულ შეზღუდვებს - ქრისტინე ვარდანიანს შესთავაზა, ამასთან დაკავშირებით მკაფიო პოზიცია დაეფიქსირებინა.

რუბინიანმა იკითხა, მიიჩნევს თუ არა ოპოზიციური ფრაქცია, რომ სომხეთის სამეურნეო სუბიექტების პროდუქცია ევრაზიული ეკონომიკური კავშირის სტანდარტებს არღვევს, და არის თუ არა დასაბუთებული, მაგალითად, მინერალურ წყალ „ჯერმუკთან“ დაკავშირებით წარმოქმნილი პრობლემები.

„თუ მიიჩნევთ, რომ ჩვენი პროდუქცია არცერთ სტანდარტს არ არღვევს, გთხოვთ მითხრათ: პარტნიორულია იმ საქონელზე ეკონომიკური შეზღუდვის დაწესება, რომელიც არცერთ სტანდარტს არ არღვევს? განა აქ საქმე არ გვაქვს ზეწოლის გამოვლინებასთან, განა ეს ზეწოლა თავისთავად არ შეიცავს საფრთხეს, მაგალითად - ჩვენი სუვერენიტეტის წინააღმდეგ?“, - იკითხა რუბინიანმა.

პარლამენტის თავმჯდომარემ ქრისტინე ვარდანიანს მოუწოდა, თავის გამოსვლაში პირდაპირი და მკაფიო პასუხი გაეცეს ამ შეკითხვებზე - ხაზი გაუსვა რა, რომ მათ გარშემო დისკუსია შინაარსობრივი პოლიტიკური დებატია.