ნეთანიაჰუ აშშ-ში მიემგზავრება: დაგეგმილია შეხვედრა ტრამპთან

ისრაელის პრემიერ-მინისტრი ბენიამინ ნეთანიაჰუ 27 ივლისს ვაშინგტონში მიემგზავრება. „არმენპრესის“ ცნობით, ამის შესახებ The Times of Israel-ს მისმა ოფისმა აცნობა.

მოსალოდნელია, რომ იგი 28 ივლისს თეთრ სახლში აშშ-ის პრეზიდენტ დონალდ ტრამპს შეხვდება და სენატორ ლინდსი გრემის დაკრძალვის ცერემონიას დაესწრება. 30 ივლისს იგი ისრაელში დაბრუნდება.

გავრცელებული ინფორმაციით, ნეთანიაჰუ ვაშინგტონში „ისრაელისა და აშშ-ისთვის ორმხრივი ინტერესის შემცველ საკითხებს“ განიხილავს.

BBC-ის ცნობით, მანამდე ისრაელის პრემიერ-მინისტრმა განაცხადა, რომ გეგმავს მონაწილეობა მიიღოს გაეროს გენერალურ ასამბლეაში, რომელიც მიმდინარე წლის შემოდგომაზე ნიუ-იორკში გაიმართება - ნიუ-იორკის მერის, ზოჰრან მამდანის მიერ მისი დაკავებისკენ გაჟღერებული მოწოდებების მიუხედავად.

გასულ კვირას მამდანიმ ნეთანიაჰუს „ომის დამნაშავე“ უწოდა და აშშ-ის მთავრობას მოუწოდა, ქვეყანაში შესვლის შემთხვევაში, სისხლის სამართლის საერთაშორისო სასამართლოს მიერ გაცემული მისი დაკავების ორდერი აღასრულოს.

მოგვიანებით მამდანიმ აღიარა, რომ ნეთანიაჰუს დაპატიმრების სამართლებრივი უფლებამოსილება არ გააჩნია.

სისხლის სამართლის საერთაშორისო სასამართლომ 2024 წლის ნოემბერში ნეთანიაჰუსა და ისრაელის ყოფილი თავდაცვის მინისტრის, იოავ გალანტის დაკავების ორდერები გასცა ღაზას სექტორში ომის დანაშაულების ბრალდებით.