გევორგ პაპოიანმა და დეივიდ ალენმა აშშ-ის მიერ სომხეთისთვის საბაზრო ეკონომიკის მქონე ქვეყნის სტატუსის მინიჭების პროცესი განიხილეს

სომხეთის ეკონომიკის მინისტრმა გევორგ პაპოიანმა 23 ივლისს სომხეთში აშშ-ის საქმეთა დროებითი რწმუნებული დეივიდ ალენი და აშშ-ის საელჩოს ეკონომიკური და სავაჭრო განყოფილების ხელმძღვანელი ედვარდ აიკლერი მიიღო.

„არმენპრესის“ ცნობით, ამის შესახებ ინფორმაციას სომხეთის ეკონომიკის სამინისტრო ავრცელებს.

შეხვედრისას მხარეებმა დაადასტურეს, რომ სომხეთსა და აშშ-ის შორის ეკონომიკური თანამშრომლობა დინამიკურად ვითარდება და აღნიშნეს ბოლო პერიოდში დაფიქსირებული დადებითი პროგრესი.

ასევე განიხილეს აშშ-ის მიერ სომხეთისთვის საბაზრო ეკონომიკის მქონე ქვეყნის სტატუსის მინიჭების პროცესთან დაკავშირებული საკითხები.

მინისტრმა რწმენა გამოთქვა, რომ ჩამოყალიბებული ეფექტიანი თანამშრომლობა ხელს შეუწყობს პროცესის თანმიმდევრულ დაწინაურებასა და ორმხრივი ინტერესის შემცველი ეკონომიკური დღის წესრიგის შემდგომ განვითარებას.

აშშ-ის მიერ რომელიმე ქვეყნისთვის „საბაზრო ეკონომიკის მქონე ქვეყნის“ (Market Economy Status, MES) სტატუსის მინიჭება ნიშნავს, რომ ვაშინგტონი ოფიციალურად აღიარებს, რომ ამ ქვეყნის ეკონომიკაში ფასები და ხარჯები ძირითადად საბაზრო მექანიზმებით ყალიბდება და არა სახელმწიფოს პირდაპირი კონტროლით. ამ სტატუსს შეუძლია გააუმჯობესოს ქვეყნის საინვესტიციო რეპუტაცია, გააადვილოს ზოგიერთი მწარმოებლის გასვლა აშშ-ის ბაზარზე, შეამციროს ანტიდემპინგურ საქმეებზე დამატებითი საბაჟო გადასახადების რისკი და აჩვენოს, რომ აშშ მოცემული ქვეყნის ეკონომიკურ სისტემას მეტად საბაზროდ მიიჩნევს.