ღია საზღვრები გარდასახავს სომხეთის ეკონომიკურ მომავალს, ევროკავშირი მზადაა ეს ხედვა რეალობად აქციოს - ევროკომისიის პრეზიდენტი

ევროკომისიის პრეზიდენტმა ურსულა ფონ დერ ლაიენმა ისტორიული მოვლენა უწოდა 2025 წლის აგვისტოში, ვაშინგტონში, სომხეთსა და აზერბაიჯანს შორის სამშვიდობო შეთანხმების პარაფირებას.

„არმენპრესის“ ცნობით, ევროკომისიის პრეზიდენტმა ამის შესახებ ერევანში, სომხეთის პრემიერ-მინისტრ ნიკოლ ფაშინიანთან ერთად გამართულ ერთობლივ პრესკონფერენციაზე განაცხადა.

„გასულ წელს სამშვიდობო შეთანხმების პარაფირება ისტორიული მოვლენა და ერთ-ერთი უმნიშვნელოვანესი ნაბიჯი იყო, რომელიც ამ რეგიონმა ბოლო ათწლეულების განმავლობაში გადადგა. იგივე ეხება თურქეთთან ურთიერთობების ნორმალიზების უწყვეტ პროცესს. ამ გადაწყვეტილებებმა პოლიტიკური გამბედაობა და ლიდერობა მოითხოვა, მისი ნაყოფი კი შთამბეჭდავი იქნება. ღია საზღვრები სრულად გარდასახავს სომხეთის ეკონომიკურ მომავალს, მას მსოფლიოს სტრატეგიულად მნიშვნელოვან გზაჯვარედინებთან დააკავშირებს, ამიტომ ჩვენ მზად ვართ, ერთად ვაქციოთ ეს ხედვა რეალობად“, - განაცხადა ევროკომისიის პრეზიდენტმა.

სამხრეთ კავკასიაში რეგიონული კავშირების სტიმულირების კონტექსტში, ევროკომისიის პრეზიდენტმა ისაუბრა 200 მილიონი ევროს ოდენობის მხარდაჭერის პაკეტზე, რომელიც ხორციელდება ახლახან ამუშავებული სატრანსპორტო ინფრასტრუქტურის განვითარების ინტერრეგიონული პლატფორმისა და ევროკავშირის ინიციატივის - „კავშირები მშვიდობისთვის“ ფარგლებში, რომელსაც 2 მილიარდამდე ევროს სახელმწიფო და კერძო ინვესტიციების მოზიდვის პოტენციალი აქვს.

მან ასევე შეახსენა დამსწრეებს, რომ 1 ივლისს, ბაქოში ყოფნისას, განაცხადა 20 მილიონი ევროს გამოყოფის შესახებ, რაც მიზნად ისახავს სომეხ და აზერბაიჯანელ ხალხებს შორის მშვიდობის ხელშეწყობას.

მისი თქმით, ამ დამხმარე პროგრამების წყალობით, სომხეთს შეუძლია გააგრძელოს მიმდინარე პროექტების რეალიზება, მათ შორის სასაზღვრო გამშვები პუნქტებისა და საგზაო ინფრასტრუქტურის განვითარება.

„ჩვენ ვაშენებთ რეალურ ინფრასტრუქტურას, რომელიც ხელს უწყობს მშვიდობას. ამავდროულად, ვადებთ ხიდებს დემოკრატიებს შორის. ჩვენ ასევე გვსურს მხარი დავუჭიროთ სომხეთის სასაზღვრო თემებისა და მიკროსაწარმოების პოტენციალის ამაღლებას“, - აღნიშნა ევროკომისიის პრეზიდენტმა.

ურსულა ფონ დერ ლაიენმა კიდევ ერთხელ ხაზგასმით აღნიშნა, რომ სომხეთს შეუძლია ევროკავშირის იმედი ჰქონდეს.

ევროკომისიის პრეზიდენტი სომხეთს სამუშაო ვიზიტით დღეს, 2 ივლისს, დილით ეწვია. სომხეთის რესპუბლიკის პრემიერ-მინისტრმა ნიკოლ ფაშინიანმა მთავრობის ადმინისტრაციაში ევროკომისიის პრეზიდენტ ურსულა ფონ დერ ლაიენს უმასპინძლა.