3 წუთი კითხვის
ევროკომისიის პრეზიდენტი ურსულა ფონ დერ ლაიენი მომავალ კვირას სომხეთში ვიზიტისთვის ემზადება.
„არმენპრესის“ ცნობით, ამის შესახებ Politico წერს ვიზიტის გეგმებთან დაკავშირებულ სამ ინფორმირებულ წყაროზე დაყრდნობით.
გამოცემის ინფორმაციით, დელეგაციის შემადგენლობაში ასევე იქნება ევროკომისარი გაფართოების საკითხებში მარტა კოსი. ვიზიტი 1 ივლისს იგეგმება, თუმცა Politico აღნიშნავს, რომ გეგმები ჯერ საბოლოოდ არ არის დადასტურებული.
გამოცემა წერს, რომ ეს ვიზიტი განიხილება, როგორც უმაღლესი დონის მხარდაჭერის სიგნალი სომხეთის პრემიერ-მინისტრ ნიკოლ ფაშინიანისადმი, მისი ხელმძღვანელობით მოქმედი პოლიტიკური ძალის მიერ ივნისში გამართულ საპარლამენტო არჩევნებში გამარჯვების შემდეგ.
Politico-ს შეფასებით, ვიზიტი ემთხვევა იმ ეტაპს, როდესაც ფაშინიანის მთავრობა ცდილობს განამტკიცოს სომხეთის საგარეო პოლიტიკური კურსის შემობრუნება მოსკოვიდან დასავლეთისკენ და გააღრმავოს ურთიერთობები ევროკავშირთან.
გამოცემასთან საუბრისას ევროკავშირის ერთ-ერთმა მაღალჩინოსანმა აღნიშნა, რომ სომხეთი რუსეთის მხრიდან „ინტენსიური და თანმიმდევრული ზეწოლის“ ქვეშ იმყოფება, ხოლო მსგავსი ვიზიტი შესაძლოა მხარდაჭერის ძლიერი გზავნილი იყოს ერევნისთვის.
„ეს იქნება გზავნილი იმისა, რომ ევროპა სომხეთის გვერდით დგას“, - განაცხადა Politico-ს ერთ-ერთმა რესპონდენტმა.
გამოცემა ასევე აღნიშნავს, რომ შესაძლო ვიზიტმა გავლენა მოახდინა ბრიუსელის სამუშაო დღის წესრიგზე. Politico-ს ცნობით, 1 ივლისს დაგეგმილი ევროკომისიის კოლეგიის სხდომა გაუქმდა, რის გამოც არაერთი საკანონმდებლო ინიციატივის მიღება გადავადდა ან შეიცვალა.
გამოცემის თანახმად, ამ ინიციატივებს შორისაა ევროკომისიის აქტი სახელმწიფო შესყიდვების შესახებ, ევროკავშირის სატენდერო წესების გადახედვის გეგმა, აგრეთვე ერთიანი თავდაცვის ბაზრის, ინოვაციებისა და მეცხოველეობის სფეროებთან დაკავშირებული ინიციატივები.
Politico იხსენებს, რომ ეს შეიძლება იყოს ურსულა ფონ დერ ლაიენის მეორე ვიზიტი სომხეთში ორ თვეზე ნაკლებ დროში. ევროკომისიის პრეზიდენტი მაისში ერევანში ევროპული პოლიტიკური გაერთიანების სამიტში მონაწილეობის მისაღებად იმყოფებოდა, რის შემდეგაც მან ასევე მიიღო მონაწილეობა ევროკავშირი-სომხეთის პირველ სამიტში.