უკრაინაში სომხური ყვავილების პირველი პარტია ჩავიდა

რუსეთის მიერ სომხური ყვავილების იმპორტის აკრძალვის ფონზე, სომხეთი საექსპორტო ბაზრების დივერსიფიკაციას ახდენს. სომხეთმა უკვე მოახდინა ყვავილების ერთი პარტიის - 5500 ყვავილის ექსპორტი ლატვიაში.

ნიდერლანდების საგარეო საქმეთა მინისტრმა ტომ ბერენდსენმა კი 7 ივნისს განაცხადა, რომ მეყვავილეობის უმსხვილესი საერთაშორისო ბაზარი კარებს უღებს სომეხ ყვავილების მწარმოებლებს, რითაც სომეხ მწარმოებლებს ევროპისა და მის ფარგლებს გარეთ არსებულ მყიდველებთან აკავშირებს.

ნიდერლანდების საგარეო საქმეთა მინისტრმა დაწერა, რომ მისი ქვეყანა მხარს უჭერს ევროკავშირის მიერ სომხეთისთვის განკუთვნილ დახმარების პაკეტს, რომლის შესახებაც 4 ივნისს ევროკომისიის პრეზიდენტმა ურსულა ფონ დერ ლაიენმა განაცხადა.

„ჩვენ შევისწავლეთ, თუ როგორ შეგვიძლია პრაქტიკულად დავეხმაროთ დაზარალებულ სექტორებს, როგორიცაა სომხური ყვავილების წარმოება. შედეგად, Royal Flora Holland (რედ. Royal Flora Holland მეყვავილეობის უმსხვილესი საერთაშორისო ბაზარია) ახლა ხსნის თავის ბაზარს სომეხი ყვავილების მწარმოებლებისთვის, რაც მათ ევროპისა და მის ფარგლებს გარეთ არსებულ მყიდველებთან აკავშირებს“, - დაწერა მან.

სომხური ყვავილების კიდევ ერთი პარტია უკვე უკრაინაში ჩავიდა. 1 სატვირთო მანქანით უკრაინაში 9500 ყვავილის ექსპორტი განხორციელდა, უახლოეს მომავალში კი უკრაინაში სომხური ყვავილებით დატვირთული მეორე სატვირთო მანქანაც ჩავა. მეორე სატვირთოშიც დაახლოებით იგივე რაოდენობის ყვავილია.

„არმენპრესთან“ საუბარში ამის შესახებ კიევში მცხოვრებმა პოლიტიკურმა ანალიტიკოსმა მარატ ჰაკობიანმა განაცხადა და აღნიშნა, რომ უკრაინაში სომხური ყვავილების იმპორტიორი იქ მცხოვრები სომეხი ბიზნესმენია.

მარატ ჰაკობიანის ინფორმაციით, უკრაინაში ჩასული სომხური ყვავილების პირველი პარტია თითქმის სრულად რეალიზებულია, ხოლო მეორე სატვირთო მანქანა უკრაინაში უახლოეს დღეებში იქნება.

მან ასევე აღნიშნა, რომ სოციალურ ქსელებში უკვე ვრცელდება ვიდეოები, სადაც ყვავილების მაღაზიების მფლობელები მიღებულ სომხურ ყვავილებს აჩვენებენ და მათი გაყიდვის დაწყების შესახებ აცხადებენ.

შეგახსენებთ, რომ რუსეთის ვეტერინარული და ფიტოსანიტარიული ზედამხედველობის ფედერალურმა სამსახურმა („როსსელხოზნადზორი“) მიიღო გადაწყვეტილება 22 მაისიდან სომხეთის რესპუბლიკიდან ყვავილების იმპორტის დროებით შეჩერების შესახებ. აღინიშნა, რომ შეზღუდვები იმოქმედებს მანამ, სანამ სომხური სათბურების შემოწმება და მიღებული მონაცემების შემაჯამებელი ანალიზი არ დასრულდება.

რუსულმა მხარემ ეს ნაბიჯი საკუთარი ფიტოსანიტარიული უსაფრთხოების უზრუნველყოფის აუცილებლობით დაასაბუთა. „როსსელხოზნადზორი“ ამტკიცებდა, რომ სომხურ ყვავილების პარტიებში ვითომდა აღმოჩენილ იქნა მავნებლები და ობიექტები, რომლებიც ევრაზიული ეკონომიკური კავშირის ტერიტორიისთვის საკარანტინოდ მიიჩნევა.