არარატ მირზოიანმა ევროკავშირის საგარეო საქმეთა მინისტრების საბჭოს ფორმატის შეხვედრაში მიიღო მონაწილეობა
3 წუთი კითხვის
სომხეთის საგარეო საქმეთა მინისტრი არარატ მირზოიანი, საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის კაია კალასის მიწვევით, ევროკავშირის საგარეო საქმეთა მინისტრების საბჭოს ფორმატის შეხვედრას დაესწრო. „არმენპრესის“ ცნობით, ამის შესახებ ინფორმაციას სომხეთის რესპუბლიკის საგარეო საქმეთა სამინისტრო ავრცელებს.
სამუშაო საუზმის ფორმატში გამართულ დისკუსიაში მონაწილეობდნენ ევროკომისიის ვიცე-პრეზიდენტი, საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი კაია კალასი, ევროკავშირის გაფართოების საკითხებში ევროკომისარი მარტა კოსი და ევროკავშირის წევრი ქვეყნების საგარეო საქმეთა მინისტრები და წარმომადგენლები.
ევროკავშირელმა პარტნიორებმა მინისტრ მირზოიანს სომხეთში ჩატარებული დემოკრატიული საპარლამენტო არჩევნები და პარტია „სამოქალაქო ხელშეკრულების“ გამარჯვება მიულოცეს. ხაზი გაესვა ევროკავშირისა და წევრი ქვეყნების მხარდაჭერას სომხეთ-ევროკავშირის პარტნიორობის სტრატეგიული დღის წესრიგის თანმიმდევრული რეალიზაციის საქმეში და პოლიტიკურ მზაობას ევროინტეგრაციის წინსვლის პროცესში.
მინისტრმა მირზოიანმა წარმოადგინა სომხეთში და სომხეთის ირგვლივ განვითარებული მოვლენები წინასაარჩევნო და პოსტსაარჩევნო პერიოდში. მან ხაზგასმით აღნიშნა, რომ საკუთარი არჩევანით სომხეთის მოქალაქეებმა კიდევ ერთხელ დაადასტურეს ნება, იცხოვრონ მშვიდობით და დაიცვან დამოუკიდებლობა, სუვერენიტეტი, დემოკრატიული რეფორმების შეუქცევადობა, განვითარების არჩეული გზა, ისევე როგორც სომხეთის მისწრაფებები ევროპული პერსპექტივების მიმართ.
მინისტრმა მირზოიანმა აღნიშნა, რომ ფაქტი, როდესაც არჩევნების შემდეგ პირველი ვიზიტი ხორციელდება სწორედ ევროკავშირთან ამ ფორმატში დისკუსიის მიზნით, რაც მიმართულია სომხეთ-ევროკავშირის პარტნიორობის კიდევ უფრო გაღრმავებისკენ, მოწმობს ორმხრივ მზაობაზე.
აზრთა გაცვლა გაიმართა სომხეთ-ევროკავშირის სავაჭრო ბრუნვის გაზრდის, სომხეთის ეკონომიკური და ენერგეტიკული მდგრადობის ამაღლებისკენ მიმართული მოქმედი მექანიზმებისა და შესაძლო ნაბიჯების ირგვლივ. მინისტრმა მირზოიანმა მაღალი შეფასება მისცა ჰიბრიდულ საფრთხეებთან ბრძოლასა და ეკონომიკური კავშირების დივერსიფიკაციის მიმართულებით ევროკავშირისა და წევრი სახელმწიფოების მიერ აქამდე გაწეულ დახმარებას. მიღწეულ იქნა შეთანხმება ამ მიმართულებით მუშაობის გაგრძელებაზე როგორც ევროკავშირის სტრუქტურებთან, ისე ევროკავშირის ცალკეულ ქვეყნებთან აქტიური თანამშრომლობით.