ფაშინიანმა და პუტინმა ასტანაში გამართული ევრაზიული ეკონომიკური უმაღლესი საბჭოს სხდომის შედეგები განიხილეს

სომხეთის რესპუბლიკის პრემიერ-მინისტრმა ნიკოლ ფაშინიანმა და რუსეთის ფედერაციის პრეზიდენტმა ვლადიმირ პუტინმა სატელეფონო საუბრისას ყაზახეთის დედაქალაქ ასტანაში, 29 მაისს გამართული ევრაზიული ეკონომიკური უმაღლესი საბჭოს სხდომის შედეგები განიხილეს.

„არმენპრესის“ ცნობით, ამის შესახებ ინფორმაციას კრემლის ოფიციალური ვებგვერდი ავრცელებს.

„სატელეფონო საუბრისას მხარეებმა 29 მაისს ასტანაში გამართული ევრაზიული ეკონომიკური უმაღლესი საბჭოს სხდომის შედეგები შეაჯამეს“, - ნათქვამია განცხადებაში.

შეგახსენებთ, რომ ასტანაში გამართულ ევრაზიული ეკონომიკური კავშირის უმაღლესი საბჭოს სხდომაზე სომხეთი ვიცე-პრემიერმა მჰერ გრიგორიანმა წარმოადგინა, ვინაიდან პრემიერ-მინისტრი ნიკოლ ფაშინიანი წინასაარჩევნო კამპანიის ფარგლებში შვებულებაში იმყოფება.

სხდომის შედეგად, კავშირის წევრი ოთხი ქვეყნის - რუსეთის, ყაზახეთის, ბელარუსისა და ყირგიზეთის პრეზიდენტებმა მიიღეს ერთობლივი განცხადება ევრაზიულ ეკონომიკურ კავშირში სომხეთის ირგვლივ შექმნილ ვითარებასთან დაკავშირებით. მათ სომხეთის ხელისუფლებას მოუწოდეს, რაც შეიძლება მოკლე ვადებში ჩაატაროს რეფერენდუმი ევრაზიულ ეკონომიკურ კავშირსა და ევროკავშირს შორის არჩევანის გასაკეთებლად.

ამ განცხადების საპასუხოდ, სომხეთის პრემიერ-მინისტრმა ნიკოლ ფაშინიანმა აღნიშნა, რომ ამ ეტაპზე ქვეყანაში ევროკავშირსა და ევრაზიულ ეკონომიკურ კავშირს შორის არჩევანის თაობაზე რეფერენდუმის ჩატარების საფუძველი არ არსებობს. ფაშინიანმა ხაზგასმით აღნიშნა, რომ სომხეთი გააგრძელებს მუშაობას ევრაზიული ეკონომიკური კავშირის ფარგლებში იქამდე, სანამ ევროკავშირსა და ევრაზიულ კავშირს შორის არჩევანის გაკეთება გარდაუვალი არ გახდება.