2 წუთი კითხვის
ევრაზიული ეკონომიკური კავშირის წევრი ოთხი ქვეყნის ლიდერმა ასტანის სამიტზე განცხადება მიიღო და იგი სომხეთის ვიცე-პრემიერ მჰერ გრიგორიანს გადასცა.
„არმენპრესის“ ცნობით, „ტასზე“ დაყრდნობით, ამის შესახებ ჟურნალისტებს რუსეთის პრეზიდენტის თანაშემწემ იური უშაკოვმა განუცხადა.
მისი თქმით, შეხვედრაზე განიხილეს სომხეთის პოზიციასთან დაკავშირებით შექმნილი ვითარება.
„მიღებულია ოთხი ლიდერის განცხადება“, - თქვა უშაკოვმა.
დოკუმენტი სომხეთის ვიცე-პრემიერს რუსეთის პრეზიდენტის ვლადიმირ პუტინის, ბელარუსის პრეზიდენტის ალექსანდრ ლუკაშენკოს, ყაზახეთის პრეზიდენტის ყასიმ-ჟომარტ თოყაევისა და ყირგიზეთის პრეზიდენტის სადირ ჟაპაროვის სახელით გადაეცა.
ჟურნალისტების კითხვაზე, წაიღებს თუ არა მჰერ გრიგორიანი ამ დოკუმენტს ერევანში, უშაკოვმა დადებითად უპასუხა.
ასტანაში 29 მაისს ევრაზიული ეკონომიკური უმაღლესი საბჭოს სხდომა გაიმართა. სომხეთის პრემიერ-მინისტრი ნიკოლ ფაშინიანი სხდომას არ დასწრებია, სომხეთს კი ვიცე-პრემიერი მჰერ გრიგორიანი წარმოადგენდა.
რუსეთის ვიცე-პრემიერმა ალექსეი ოვერჩუკმა განაცხადა, რომ კავშირის უმაღლესი საბჭოს სხდომაზე სომხეთის სტატუსის საკითხი განიხილებოდა, ხოლო სომხეთის პრემიერ-მინისტრმა ნიკოლ ფაშინიანმა დაადასტურა, რომ სომხეთი არ აპირებს ევრაზიული ეკონომიკური კავშირიდან გამოსვლას და გააგრძელებს მუშაობას ორგანიზაციის ფარგლებში საკუთარი ეკონომიკური ინტერესების დასაცავად.