სხვადასხვა ქვეყნები TRIPP პროექტის კომპონენტების მიმართ ინტერესს იჩენენ - მირზოიანი

სომხეთის ტერიტორიაზე განსახორციელებელი TRIPP პროექტის სხვადასხვა კომპონენტების მიმართ არაერთმა ქვეყანამ გამოიჩინა ინტერესი. „არმენპრესის“ ცნობით, ამის შესახებ ჟურნალისტებთან საუბრისას სომხეთის საგარეო საქმეთა მინისტრმა არარატ მირზოიანმა განაცხადა.

„არსებობენ სხვადასხვა მხარეები, ქვეყნები, კომპანიები, რომლებმაც გამოხატეს ინტერესი TRIPP პროექტის სხვადასხვა ასპექტების, ამა თუ იმ კომპონენტის კონკრეტული ნაწილის მიმართ - იქნება ეს უშუალოდ ფიზიკური მშენებლობა, საქონლის მიწოდება, თუ ის კომპიუტერული პროგრამები, რომლებითაც სისტემის მართვა უნდა განხორციელდეს. რიგ პარტნიორებთან გვქონდა წინასწარი დისკუსიები და აზრთა გაზიარებაც, თუმცა ამ ეტაპზე არ მსურს რაიმე შეჯამება და სახელების დასახელება“, - განაცხადა მირზოიანმა.

სომხეთის რესპუბლიკის საგარეო საქმეთა მინისტრმა არარატ მირზოიანმა და ამერიკის შეერთებული შტატების სახელმწიფო მდივანმა მარკო რუბიომ 26 მაისს, ერევანში, მოახდინეს სტრატეგიული თანამშრომლობის ჩარჩო შეთანხმების პარაფირება პროექტის - „ტრამპის მარშრუტი საერთაშორისო მშვიდობისა და საერთაშორისო კეთილდღეობისთვის“ თაობაზე.