2 წუთი კითხვის
სომხეთის საგარეო საქმეთა მინისტრმა არარატ მირზოიანმა ხელახლა დაადასტურა, რომ სომხეთის ხელისუფლებას არანაირი სურვილი არ აქვს, დაძაბულობა შეიტანოს რუსეთთან ურთიერთობებში.
„არმენპრესის“ ცნობით, არარატ მირზოიანი სომხეთ-რუსეთის ურთიერთობების ამჟამინდელ მდგომარეობას 26 მაისს გამართულ პრესკონფერენციაზე შეეხო.
„ჩვენ ზოგადად არანაირი სურვილი არ გვაქვს, დაძაბულობა შეიტანოთ სომხეთ-რუსეთის ურთიერთობებში, პოლიტიკურ დიალოგში, ეკონომიკურ კავშირებში - არც პირდაპირ და არც მრავალმხრივ პლატფორმებზე ჩვენს თანამშრომლობაში, იქნება ეს ევრაზიული ეკონომიკური კავშირი, დსთ თუ სხვა ფორმატები. ყველა იმ პრობლემას, რომელიც წარმოიქმნა ან შეიძლება წარმოიქმნას - პრობლემები კი ნებისმიერ შესაძლო ურთიერთობაში დროდადრო ჩნდება - ვიმედოვნებთ და განწყობილნი ვართ, რომ ჯანსაღ, კონსტრუქციულ და პარტნიორულ ატმოსფეროში განვიხილავთ და ვიპოვით გადაჭრის გზებს“, - განაცხადა მირზოიანმა.
მისი დაკვირვებით, არსებობს ტენდენცია, რომ სომხეთიდან რუსეთში გარკვეული საქონლის ექსპორტის პრობლემები დაუკავშირონ ორ ქვეყანას შორის ურთიერთობებს, სომხეთის პროევროპულ, პროდასავლურ პოლიტიკას ან არჩევნებს, თუმცა მსგავსი პრობლემები ყოველთვის არსებობდა.
მირზოიანის თქმით, ძალისხმევის შემთხვევაში, ნებისმიერ მსურველს შეუძლია იპოვოს სომხეთიდან რუსეთში ხილ-ბოსტნეულისა თუ ალკოჰოლური სასმელების ექსპორტის შეფერხების მაგალითები როგორც 5, ისე 25 წლის წინაც.
ამავდროულად, საგარეო საქმეთა მინისტრმა ხაზგასმით აღნიშნა, რომ სომხეთის რესპუბლიკამ საჯაროდ არაერთხელ განაცხადა ეკონომიკური დივერსიფიკაციის აუცილებლობის შესახებ.
„დივერსიფიკაცია ჩვენთვის აუცილებელია და ჩვენ უნდა გადავდგათ უწყვეტი ნაბიჯები ახალი ბაზრების, გასაღების ბაზრებისა და მიწოდების წყაროების მოსაძიებლად“, - შეაჯამა მირზოიანმა.