1 წუთი კითხვის
სომხეთის პრემიერ-მინისტრმა, პარტია „სამოქალაქო ხელშეკრულების“ პრემიერ-მინისტრობის კანდიდატმა ნიკოლ ფაშინიანმა განაცხადა, რომ ქვეყანაში ამომრჩევლის მოსყიდვით შედეგზე ზემოქმედება უკვე შეუძლებლად მიაჩნია.
„არმენპრესის“ ცნობით, ამის შესახებ ფაშინიანმა ჟურნალისტებთან საუბრისას აღნიშნა. მან კომენტარი გააკეთა ანტიკორუფციული კომიტეტის მიერ პერიოდულად გავრცელებულ ინფორმაციაზე, რომელიც წინასაარჩევნოდ პოლიტიკური ძალების მხრიდან ამომრჩევლის მოსყიდვის ან დაპირების შემთხვევებს ეხება.
„ეს მოვლენები შემაშფოთებელია, ჩვენ სერიოზულად უნდა ვებრძოლოთ მოსყიდვას. ნება მიბოძეთ გამოვთქვა რწმენა, რომ სომხეთში ამომრჩევლის მოსყიდვით საკითხების გადაჭრა აღარ არის შესაძლებელი, შესაძლებელია მხოლოდ რამდენიმე ხმის „მოპარვა“, - განაცხადა ფაშინიანმა.
ნიკოლ ფაშინიანმა აღნიშნა, რომ სამართალდამცავი ორგანოები, განსაკუთრებით კი ანტიკორუფციული კომიტეტი, ეფექტურად ებრძვიან ამ მოვლენას.
შეგახსენებთ, რომ ანტიკორუფციული კომიტეტი რეგულარულად აქვეყნებს ცნობებს უპირატესად პარტია „ძლიერი სომხეთის“ წარმომადგენლების მხრიდან ამომრჩევლის მოსყიდვის ან დაპირების ფაქტებზე და ასაჯაროებს შესაბამის აუდიოჩანაწერებს.