ერევნის სამიტზე დეზინფორმაციისა და ჰიბრიდული საფრთხეების წინააღმდეგ ბრძოლას განიხილავენ - მეცოლა
2 წუთი კითხვის
ერევანში ევროპული პოლიტიკური საზოგადოების მე-8 სამიტის მონაწილეები მოკავშირეებსა და პარტნიორებთან შემდგომი ინტეგრაციისა და ჰიბრიდული საფრთხეების წინააღმდეგ ბრძოლის საკითხებს განიხილავენ. „არმენპრესის“ ცნობით, ამის შესახებ სამიტზე მისვლისას ევროპარლამენტის პრეზიდენტმა რობერტა მეცოლამ განაცხადა.
მან აღნიშნა, რომ ამ კუთხით მნიშვნელოვანია სამიტში კანადის პრემიერ-მინისტრის, მარკ კარნის მონაწილეობა, ხოლო 3 მაისს მასთან გამართული შეხვედრა შესანიშნავად შეაფასა.
რობერტა მეცოლამ მადლობა გადაუხადა სომხეთის პრემიერ-მინისტრ ნიკოლ ფაშინიანს და შეახსენა, რომ რამდენიმე დღის წინ ევროპარლამენტმა ხმების აბსოლუტური უმრავლესობით მიიღო რეზოლუცია, რომელიც მიესალმება სომხეთის ერთგულებას მტკიცე დემოკრატიისა და ევროპული ღირებულებებისადმი.
„ჩვენ განვიხილავთ დეზინფორმაციისა და ჰიბრიდული საფრთხეების წინააღმდეგ ბრძოლას. ეს აღარ არის შორეული საფრთხეები. ევროპარლამენტი განსაკუთრებულად არის მოწოდებული დაინტერესებულ მხარეებთან მუშაობისკენ მათ აღმოსაფხვრელად, რადგან ისინი რეალურ საფრთხეს უქმნიან დემოკრატიას. ომები მიმდინარეობს არა მხოლოდ ადგილზე, არამედ ციფრულ სივრცეშიც, რაც ძირს უთხრის და მიზანში იღებს ჩვენი საზოგადოების ყველაზე მოწყვლად ფენებს“, - დასძინა მეცოლამ.
მან აღნიშნა, რომ ამ მიმართულებით მუშაობა მიმდინარეობს სოციალურ პლატფორმებთან, რათა დაწესდეს კონტროლი, რომ ის ინსტრუმენტები, რომლებიც ადამიანების დასაახლოებლად შეიქმნა, ბოროტად არ იქნეს გამოყენებული.