2 წუთი კითხვის
სომხეთის პრემიერ-მინისტრი ნიკოლ ფაშინიანი ისტორიულად მიიჩნევს სომხეთისა და აზერბაიჯანის ვიცე-პრემიერების, მჰერ გრიგორიანისა და შაჰინ მუსტაფაევის ურთიერთვიზიტებს ორ ქვეყანაში.
„არმენპრესის“ ცნობით, ამის შესახებ ფაშინიანმა მთავრობის სხდომის შემდეგ გამართულ ბრიფინგზე განაცხადა, სადაც აზერბაიჯანის ვიცე-პრემიერის, შაჰინ მუსტაფაევის სომხეთში ვიზიტს გამოეხმაურა.
„ძალიან მნიშვნელოვანი მოვლენა მოხდა. ორ ქვეყანაში ვიცე-პრემიერების ვიზიტებს ისტორიულად მივიჩნევ სამშვიდობო პროცესის ინსტიტუციონალიზაციის ლოგიკაში. ძალიან მოხარული ვარ, რომ ამ ეტაპზე მივედით“, - განაცხადა ფაშინიანმა.
ნიკოლ ფაშინიანმა ხაზგასმით აღნიშნა, რომ სომხეთისა და აზერბაიჯანის ურთიერთობები მუდმივად უნდა გაუმჯობესდეს და მშვიდობა სულ უფრო გაძლიერდეს.
„უნდა დამყარდეს ნორმალური ურთიერთობები, ხოლო გრძელვადიან პერსპექტივაში, სტრატეგიული თვალსაზრისით - კეთილმეზობლური ურთიერთობები“, - აღნიშნა პრემიერ-მინისტრმა.
2026 წლის 29 აპრილს სომხეთსა და აზერბაიჯანს შორის სადელიმიტაციო კომისიების მე-13 შეხვედრა გაიმართა სომხეთის ვიცე-პრემიერ მჰერ გრიგორიანისა და აზერბაიჯანის ვიცე-პრემიერ შაჰინ მუსტაფაევის თანათავმჯდომარეობით. კომისიების წინა შეხვედრა, ასევე მჰერ გრიგორიანისა და შაჰინ მუსტაფაევის თანათავმჯდომარეობით, აზერბაიჯანში გაიმართა.