გვსურს ირანის ტერიტორიით ჩვენი ლოგისტიკური ჯაჭვებისა და შესაძლებლობების გაფართოება - ფაშინიანი ჰორმუზის სრუტის ირგვლივ არსებულ მოვლენებს შეეხო

სომხეთის ხედვა ირანთან თანამშრომლობის შესახებ სტრატეგიულია და ერევანს სურს ირანის ტერიტორიის გავლით ლოგისტიკური ჯაჭვებისა და შესაძლებლობების გაფართოება, რის კონტექსტშიც ძალზე მნიშვნელოვანია TRIPP-ის პროექტის განხორციელება.

როგორც „არმენპრესი“ იტყობინება, ამის შესახებ ბრიფინგზე სომხეთის პრემიერ-მინისტრმა ნიკოლ ფაშინიანმა განაცხადა, როდესაც ირანის ირგვლივ მიმდინარე მოვლენებს, კერძოდ, ჰორმუზის სრუტესთან დაკავშირებული პროცესების შედეგად შექმნილ ან შესაძლო ეკონომიკურ და ლოგისტიკურ კრიზისულ სცენარებსა და ალტერნატიული გზების ძიების საკითხს გამოეხმაურა.

პრემიერ-მინისტრმა შეახსენა, რომ სომხეთმა უკვე გამოხატა თავისი პოზიცია ირანის ირგვლივ განვითარებულ მოვლენებთან დაკავშირებით.

„კმაყოფილებით აღვნიშნავთ, რომ მოლაპარაკებები ჩვენს ორ მეგობარ ქვეყანას - ირანის ისლამურ რესპუბლიკასა და შეერთებულ შტატებს შორის, როგორც ჩანს, პროგრესის დინამიკას აჩვენებს. ზოგადად, ჩვენ ვქმნით ალტერნატივებს, მაგრამ ირანთან თანამშრომლობის ჩვენი ხედვა სტრატეგიულია და გვსურს ირანის ტერიტორიით ჩვენი ლოგისტიკური ჯაჭვებისა და შესაძლებლობების გაფართოება. სწორედ ამ თვალსაზრისითაა ძალზე მნიშვნელოვანი TRIPP-ის პროექტის რეალიზაცია, რადგან ამის შედეგად ჩვენ მივიღებთ სარკინიგზო კავშირს ირანთან, რაც მნიშვნელოვნად გაამარტივებს საქონლის იმპორტს სომხეთში და სომხეთიდან პროდუქციის ექსპორტს“, - ხაზგასმით აღნიშნა პრემიერ-მინისტრმა ფაშინიანმა.

მოცემული საკითხის კონტექსტში პრემიერმა ასევე აღნიშნა, რომ წინა პერიოდში უკვე არსებობდა ახალი საკომუნიკაციო გზა - სარკინიგზო კავშირი ჩინეთთან ცენტრალური აზიის გავლით, მარშრუტით: ჩინეთი-ყაზახეთი-რუსეთი-აზერბაიჯანი-საქართველო-სომხეთი.

„ვვარაუდობ, რომ ბიზნესმენები ყველა იმ შემთხვევაში, როდესაც დაინახავენ, რომ ირანის ტერიტორიით საქონლის შემოტანის პრობლემა არსებობს, ტვირთებს ამ მიმართულებით წამოიღებენ“, - განაცხადა პრემიერმა.

ფაშინიანმა ხაზგასმით აღნიშნა, რომ ამ საკითხებზე სომხეთის მთავრობა ჯერ კიდევ გასული წლიდან მუშაობს, როდესაც რეგიონში დაძაბულობა შეიმჩნეოდა.

„დარწმუნებულნი ვართ, რომ საქონლის დეფიციტი არ გვექნება. ინფლაცია სხვა საკითხია, რადგან თუ პროდუქტის ფასი წარმოშობის წერტილში იზრდება, მაშინ მასზე ჩვენი ზემოქმედების შესაძლებლობები შეზღუდულია“, - თქვა ნიკოლ ფაშინიანმა.

პრემიერ-მინისტრმა აღნიშნა, რომ მიწოდების კუთხით ალტერნატივები არსებობს, თუმცა გამოთქვა რწმენა, რომ უახლოეს მომავალში, ვითარების მოწესრიგების კვალდაკვალ, განხორციელდება TRIPP-ის პროექტი, რის შედეგადაც ჩამოყალიბდება ირან-სომხეთისა და სპარსეთის ყურე-შავი ზღვის სარკინიგზო კავშირი.