სომხეთის პრემიერ-მინისტრმა ესტონეთის საგარეო საქმეთა მინისტრი მიიღო

სომხეთის რესპუბლიკის პრემიერ-მინისტრმა ნიკოლ ფაშინიანმა ესტონეთის საგარეო საქმეთა მინისტრის, მარგუს ცაჰკნას ხელმძღვანელობით მოქმედი დელეგაცია მიიღო.

როგორც „არმენპრესი“ პრემიერ-მინისტრის აპარატის მიერ გავრცელებულ განცხადებაზე დაყრდნობით იტყობინება, ნიკოლ ფაშინიანმა ხაზი გაუსვა სომხეთ-ესტონეთის მრავალ დარგობრივ თანამშრომლობას და აღნიშნა, რომ ბოლო პერიოდში ორმხრივი ურთიერთობები ინტენსიურ ხასიათს ატარებს. პრემიერმა აღნიშნა, რომ ამის დასტურია მაღალი დონის ორმხრივი ვიზიტები, რომლებიც ახალ იმპულსს სძენს სხვადასხვა მიმართულებით კავშირების გაფართოებას.

ქვეყნის ხელმძღვანელმა ასევე მნიშვნელოვნად მიიჩნია ესტონეთის როლი სომხეთ-ევროკავშირის თანამშრომლობის განვითარების საქმეში, მათ შორის ჩვენს ქვეყანაში დემოკრატიული რეფორმების ეფექტიანად განხორციელების პროცესში.

მარგუს ცაჰკნამ ხაზი გაუსვა ესტონეთის დაინტერესებას სომხეთთან თანამშრომლობის გაღრმავების საკითხში. მან აღნიშნა, რომ ესტონეთი მზად არის გააგრძელოს მხარდაჭერა სომხეთის მთავრობის რეფორმების დღის წესრიგის წინ წასაწევად და ხელი შეუწყოს სომხეთ-ევროკავშირის ურთიერთქმედების სტიმულირებას. ესტონეთის საგარეო საქმეთა მინისტრმა მნიშვნელოვნად მიიჩნია ერევანში ევროპული პოლიტიკური გაერთიანების სამიტის გამართვა და გამოთქვა რწმენა, რომ იგი მაღალ დონეზე ჩატარდება.

ნიკოლ ფაშინიანმა და მარგუს ცაჰკნამ აზრები გაცვალეს რეგიონულ მოვლენებზე, ასევე სომხეთ-ევროკავშირის თანამშრომლობის დღის წესრიგზე, ვიზალიბერალიზაციის პროცესსა და სხვა საკითხებზე.