მთელმა მსოფლიომ იცის, რომ სამველ კარაპეტიანი ვერ იქნება პრემიერ-მინისტრობის კანდიდატი - ფაშინიანი
2 წუთი კითხვის
სომხეთის პრემიერ-მინისტრმა ნიკოლ ფაშინიანმა კიდევ ერთხელ დაადასტურა, რომ მოქმედი კონსტიტუციის რეგულაციებით, რუსეთის ფედერაციის მოქალაქეობის მქონე ბიზნესმენი და პარტია „ძლიერი სომხეთის“ თავმჯდომარე, სამველ კარაპეტიანი, სომხეთში ვერ იქნება დეპუტატობისა და პრემიერ-მინისტრობის კანდიდატი.
„არმენპრესის“ ცნობით, ფაშინიანმა ამის შესახებ ჟურნალისტებთან საუბრისას განაცხადა. მან უპასუხა დაკვირვებას იმის შესახებ, რომ პოლიტიკური ძალა „ძლიერი სომხეთის“ საარჩევნო სიას ნარეკ კარაპეტიანი ლიდერობს, თუმცა პარტია პრემიერ-მინისტრობის კანდიდატად სამველ კარაპეტიანს წარადგენს.
„მთელმა მსოფლიომ იცის, რომ თქვენ მიერ ნახსენები პირი ვერ იქნება დეპუტატობისა და პრემიერ-მინისტრობის კანდიდატი. თუ სომხეთში ჯერ კიდევ არსებობს ადამიანი, ვისთვისაც ამ საკითხთან დაკავშირებით ყველაფერი ნათელი არ არის, რა შემიძლია ვთქვა? მე მხოლოდ აშკარა ფაქტის კონსტატირება შემიძლია“, - განაცხადა ფაშინიანმა.
სომხეთის კონსტიტუციის 148-ე მუხლის თანახმად, მთავრობის წევრი უნდა აკმაყოფილებდეს დეპუტატისთვის დადგენილ მოთხოვნებს. კონსტიტუციის 48-ე მუხლის მიხედვით, ეროვნული ასამბლეის დეპუტატად შეიძლება აირჩეს ნებისმიერი პირი, რომელსაც შეუსრულდა ოცდახუთი წელი, ბოლო ოთხი წლის განმავლობაში არის მხოლოდ სომხეთის რესპუბლიკის მოქალაქე, ბოლო ოთხი წლის განმავლობაში მუდმივად ცხოვრობს სომხეთის რესპუბლიკაში, აქვს საარჩევნო უფლება და ფლობს სომხურ ენას. სამველ კარაპეტიანი ბოლო 4 წლის განმავლობაში მუდმივად არ ცხოვრობდა სომხეთში და გავრცელებული ინფორმაციით, იგი ასევე ფლობს რუსეთისა და კვიპროსის მოქალაქეობას.