სომხეთის საგარეო საქმეთა სამინისტროს გენერალური მდივანი საერთაშორისო ექსპერტთა დელეგაციას შეხვდა

სომხეთის რესპუბლიკის საგარეო საქმეთა სამინისტროს გენერალურმა მდივანმა დავით კარაპეტიანმა მიიღო საგარეო პოლიტიკის, საერთაშორისო უსაფრთხოებისა და დემოკრატიული მმართველობის სფეროებში სპეციალიზებული საერთაშორისო ექსპერტთა ჯგუფის წევრები, რომლებიც სომხეთში 23-26 მარტს იმყოფებოდნენ.

ვიზიტი ორგანიზებული იყო აშშ-ის გერმანიის მარშალის ფონდის ბუქარესტის ოფისის მიერ, ერევანში მოქმედ „კულტურისა და ცივილიზაციის კვლევების ფონდთან“ თანამშრომლობით.

როგორც „არმენპრესი“ იუწყება, შეხვედრისას მხარეებმა აზრები გაცვალეს რეგიონული და საერთაშორისო დღის წესრიგის საკითხებზე. ხაზგასმით აღინიშნა ის მნიშვნელობა, რომელსაც სომხეთის მთავრობა ანიჭებს სამოქალაქო საზოგადოების უწყვეტ ჩართულობასა და დემოკრატიული ინსტიტუტების მდგრად განვითარებას.

თანამშრომლობის გაგრძელების მიზნით, საგარეო საქმეთა სამინისტროს გენერალურმა მდივანმა დელეგაციის წევრები მიიწვია მესამე საერთაშორისო ფორუმზე - „ერევნის დიალოგი“, რომელიც ერევანში 2026 წლის 5-6 მაისს გაიმართება.