367.38
გევორგ პაპოიანის მიწვევით სომხეთს საქართველოს ეკონომიკისა და მდგრადი განვითარების მინისტრი ეწვია
2 წუთი კითხვის
სომხეთის რესპუბლიკის ეკონომიკის მინისტრის, გევორგ პაპოიანის მიწვევით, სომხეთში იმყოფება საქართველოს ეკონომიკისა და მდგრადი განვითარების მინისტრის, მარიამ ქვრივიშვილის ხელმძღვანელობით მოქმედი დელეგაცია.
ვიზიტის ფარგლებში, 20 თებერვალს, სომხეთის რესპუბლიკის ეკონომიკის სამინისტროში ორი ქვეყნის მინისტრების ოფიციალური შეხვედრა გაიმართა.
როგორც „არმენპრესი“ სომხეთის ეკონომიკის სამინისტროს მიერ გავრცელებული განცხადებიდან იტყობინება, სომხეთ-საქართველოს ორმხრივი დღის წესრიგის ფარგლებში, მხარეებმა განიხილეს თანამშრომლობის გაფართოებისკენ მიმართული არაერთი პრიორიტეტი, ხაზი გაუსვეს ეკონომიკური კავშირების სტრატეგიულ მნიშვნელობას და ორმხრივად მომგებიანი განვითარების ერთგულებას.
„დარწმუნებული ვარ, რომ ჩვენი ეკონომიკური თანამშრომლობის არსებული პოტენციალი ჯერ კიდევ არ არის სრულად რეალიზებული და დღევანდელი შეხვედრა მნიშვნელოვანი შესაძლებლობაა ჩვენი ძალისხმევის გასაერთიანებლად, ჩვენი ხალხების საკეთილდღეოდ“, - აღნიშნა გევორგ პაპოიანმა.
შეხვედრაზე განიხილეს სავაჭრო-ეკონომიკური ურთიერთობების გაღრმავების, ტვირთების შეუფერხებელი ტრანზიტის, ასევე ტურიზმის სფეროს განვითარების საკითხები.
ორივე მხარემ ხაზი გაუსვა ბიზნეს წრეებს შორის პირდაპირი კავშირების გააქტიურების მნიშვნელობას, კერძოდ, B2B ფორმატის შეხვედრების სტიმულირებას.
შეხვედრის დასასრულს, მხარეებმა დაადასტურეს მზადყოფნა ორმხრივი თანამშრომლობის შემდგომი გაღრმავების შესახებ და ხაზი გაუსვეს უწყვეტი დიალოგის მნიშვნელობას.