სომხეთმა და ერაყმა კულტურისა და ტურიზმის სფეროებში მემორანდუმის ხელმოწერის დეტალები განიხილეს

სომხეთის ეკონომიკის სამინისტროს ტურიზმის კომიტეტის თავმჯდომარე ლუსინე გევორგიანი შეხვდა სომხეთში ერაყის რესპუბლიკის საელჩოს დროებით რწმუნებულს მოჰამად ომერ სალაჰ ად-დინს. როგორც „არმენპრესი“ იტყობინება, ამის შესახებ ინფორმაცია ტურიზმის კომიტეტმა გაავრცელა.

„შეხვედრისას წარმოდგენილი იყო ტურიზმის სფეროში არსებული მდგომარეობა, მიმდინარე პროგრამები, ასევე განხილულ იქნა რიგი მნიშვნელოვანი მიმართულებები, მათ შორის, კულტურისა და ტურიზმის სფეროებში ურთიერთგაგების მემორანდუმის პროექტის ხელმოწერის პროცედურები და ვადები, სომხეთისა და ერაყის ტურისტული პოტენციალის წარდგენა და მარკეტინგული ინიციატივების შესახებ ცნობიერების ამაღლება, ტურისტული ორგანიზაციების ურთიერთთანამშრომლობა, მათ შორის, ონლაინ შეხვედრები სახელმწიფო და კერძო სექტორის წარმომადგენლებს შორის და ქვეყნების პრეზენტაცია, ტურიზმის სფეროში შემდგომი თანამშრომლობის შესაძლებლობების გაფართოება“, - ნათქვამია კომიტეტის განცხადებაში.

მხარეებმა ასევე ხაზგასმით აღნიშნეს ორმხრივი თანამშრომლობის გაღრმავებისა და ტურისტული გაცვლების გააქტიურების აუცილებლობა.