ალენ სიმონიანი დარწმუნებულია, რომ აზერბაიჯანში მყოფი ყველა სომეხი ტყვე დაბრუნდება სამშობლოში

სომხეთის რესპუბლიკის ეროვნული ასამბლეის თავმჯდომარემ, ალენ სიმონიანმა განაცხადა, რომ სომხეთის ხელისუფლება ყველაფერს აკეთებს იმისათვის, რომ აზერბაიჯანში მყოფი ყველა სომეხი ტყვე გათავისუფლდეს. მისი თქმით, დარწმუნებულია, რომ ხელისუფლების ნაბიჯების შედეგად ყველა ტყვე დაბრუნდება სამშობლოში.

„არმენპრესის“ ინფორმაციით, ჟურნალისტებთან გამართულ ბრიფინგზე ალენ სიმონიანმა აღნიშნა, რომ ამჟამად აზერბაიჯანში 23 დადასტურებული ტყვე იმყოფება, მაშინ როდესაც 2020 წლის ომის შემდეგ მათი რაოდენობა 200-მდე აღწევდა.

„გვქონდა დაახლოებით 200 ტყვე, ახლა კი მხოლოდ 23 დადასტურებულია. მოდით დაველოდოთ და მე მჯერა, რომ ამ ნაბიჯების შედეგად მათი რიცხვი ნულამდე დაიყვანება და ყველა დაბრუნდება. დაბრუნდებიან აგრეთვე ყოფილი ყარაბაღის ხელმძღვანელები და ყველა ის ადამიანი, ვინც დატყვევებულია და ამჟამად ბაქოს ციხეებში იმყოფება. ჩვენი ხელისუფლება აკეთებდა და გააგრძელებს ყველაფერს, რათა ყველა დაუბრუნდეს სომხეთის რესპუბლიკას“, - აღნიშნა სიმონიანმა.

მისი თქმით, ოპტიმიზმი ეფუძნება როგორც წარსულ გამოცდილებას, ისე მიმდინარე ძალისხმევას.

„ომის შემდეგ გვყავდა 200-მდე ტყვე, დღეს კი მხოლოდ 23. ეს არის ათჯერ ნაკლები და ეს მაძლევს საფუძველს ოპტიმიზმისთვის. ვიცი, რა ძალისხმევას იჩენს ხელისუფლება, მე, საგარეო საქმეთა მინისტრი და სხვა სტრუქტურები“, - დასძინა ასამბლეის თავმჯდომარემ.

ამჟამად აზერბაიჯანი ადასტურებს, რომ მის ციხეებში 23 სომეხი ტყვე იმყოფება, მათ შორის არიან მთიანი ყარაბაღის ყოფილი სამხედრო-პოლიტიკური ხელმძღვანელობის წარმომადგენლები. მათი ნაწილის მიმართ ბაქოში მიმდინარეობს უკანონო სასამართლო პროცესები.