სომხეთი გააგრძელებს სამხედრო ტექნიკის შეძენას: პაპიკიანი

სომხეთი რესპუბლიკის საკუთარი საჭიროებებიდან გამომდინარე გააგრძელებს თავდაცვის სფეროში რეფორმების განხორციელებას, მათ შორის, შეიარაღებისა და სამხედრო ტექნიკის შესყიდვებს.

როგორც „არმენპრესი“ იუწყება, ამის შესახებ ჟურნალისტებთან საუბრისას განაცხადა სომხეთის თავდაცვის მინისტრმა სურენ პაპიკიანმა, როდესაც უპასუხა კითხვას 2026 წლისთვის თავდაცვის ხარჯების შემცირებაზე.

„თუ 2026 წლის ბიუჯეტს შევადარებთ წინა წლების ბიუჯეტის ზრდის ტენდენციას, არანაირი გადახრა არ შეინიშნება, გარდა იმ განსხვავებისა, რაც დაფიქსირდა 2025 წელს, როდესაც ჩვენი ხარჯები ერთბაშად გაიზარდა, ეს იყო დაგეგმილი ზრდა. თუ 2026 წელს 2024 წელთან შევადარებთ, ეს ბუნებრივი განვითარების ტემპია“, - განაცხადა პაპიკიანმა.

მინისტრმა აღნიშნა, რომ ამაში არაფერია უჩვეულო და საგანგებო.

„სომხეთი გააგრძელებს რეფორმებს საკუთარი საჭიროებების შესაბამისად, მათ შორის, შეიარაღებისა და სამხედრო ტექნიკის შესყიდვებს. თუმცა 8 აგვისტო მნიშვნელოვანი რეალობაა, რომელიც ჩვენთვის უკვე მიღებული ფაქტია, და ბუნებრივია, მას ექნება თავისი შედეგები“, - აღნიშნა მინისტრმა.

სომხეთის სახელმწიფო ბიუჯეტის თავდაცვის ხარჯები შეადგენდა: 2018 წელს - 245.173 მილიარდ დრამს, 2019 წელს - 307.983 მილიარდ დრამს, 2020 წელს - 308.862 მილიარდ დრამს, 2021 წელს - 313.123 მილიარდ დრამს, 2022 წელს - 346.779 მილიარდ დრამს, 2023 წელს - 519.523 მილიარდ დრამს, 2024 წელს - 556.193 მილიარდ დრამს, 2025 წელს - 667.052 მილიარდ დრამს, ხოლო 2026 წლისთვის გათვალისწინებულია 567.513 მილიარდი დრამის ოდენობის ხარჯი.