სომხეთის ფეხბურთის ფედერაცია მოუწოდებს შავ ბაზარზე არ შეიძინონ სომხეთი-პორტუგალიის მატჩის ბილეთები

სომხეთის ფეხბურთის ფედერაციამ მსოფლიო ჩემპიონატის საკვალიფიკაციო ეტაპის სომხეთი-პორტუგალიის მატჩის ბილეთების გაყიდვასთან დაკავშირებით განცხადება გაავრცელა.

„არმენპრესის“ ინფორმაციით, სფფ-ის მიერ გავრცელებულ განცხადებაში, კერძოდ, აღნიშნულია:

„ბევრი სფფ-ს ადანაშაულებს, რომ ბილეთის ყიდვა ვერ შეძლო. „რესპუბლიკური“ სტადიონი მაქსიმუმ 14 000 გულშემატკივარს იტევს. ბილეთის ყიდვის მოთხოვნა წარადგინა 470 000-მა პირმა. 1 გულშემატკივარს არ შეეძლო 2 ბილეთზე მეტის შეძენა, შესაბამისად შესაძლებელი იყო მხოლოდ დაახლოებით 7000 მოთხოვნის დაკმაყოფილება.

ბუნებრივია, დაახლოებით 463 000 გულშემატკივარს შეიძლება პრეტენზია ჰქონდეს, რომ ბილეთის ყიდვა ვერ შეძლო.

ბილეთების ოფიციალურ გაყიდვამდე თვეებით ადრე ინტერნეტში გამოჩნდა არაოფიციალური განცხადებები, ხოლო ახლა ზოგიერთი ასტრონომიული ფასებით ყიდის ბილეთებს.

ბილეთების გადამყიდველებთან საბრძოლველად სფფ-ს ურჩევდნენ შეხვედრის ბილეთები 100 000–200 000 დრამად გაეყიდა, მაგრამ სფფ-ის სტრატეგიის ერთ-ერთი ძირითადი მიმართულებაა ფეხბურთის აღქმა როგორც სოციალური ფენომენი. ბუნებრივია, ასეთი გაძვირება ვერ მოხდებოდა.

გაცნობებთ, რომ 14 000 ადგილიანი სტადიონის დაახლოებით 7000 ბილეთი ძალიან ხელმისაწვდომ ფასად – 1000-3000 დრამად გაიყიდა. ახლა ამ ბილეთებს ბაზარზე ათჯერ ძვირად ყიდიან.

სფფ-ის მიერ გაყიდული ყველა ბილეთის QR კოდი აქტიურდება შეხვედრის დღეს, 6 სექტემბერს. გადამყიდველებს შეუძლიათ ბილეთები რამდენიმე პირს მიჰყიდონ, მაგრამ აქტიურდება მხოლოდ ერთი QR კოდი. ამ შემთხვევაშიც შესაძლოა დიდი პრეტენზიების ტალღა წარმოიშვას, რასთანაც სფფ-ს კავშირი არ აქვს.

სფფ მოუწოდებს ბაზრიდან არ შეიძინონ ბილეთები, რათა თავიდან აიცილონ შემდგომი სირთულეები. სფფ არ არის პასუხისმგებელი სხვა პირების მიერ გაყიდულ ბილეთებზე. გადამყიდველისგან ბილეთის არმოძებნით დავეხმარებით, რომ მომავალში სომხეთის ფეხბურთიდან მთლიანად აღმოიფხვრას ეს უარყოფითი მოვლენა“.

2026 წლის მსოფლიო ჩემპიონატის საკვალიფიკაციო ეტაპის პირველ მატჩში სომხეთის ეროვნული ნაკრები 6 სექტემბერს, 20:00 საათზე, ვაზგენ სარგსიანის სახელობის „რესპუბლიკურ“ სტადიონზე პორტუგალიის ნაკრებს უმასპინძლებს.