ნიკოლ ფაშინიანმა და კაია კალასმა შეხვედრის დროს სომხეთსა და აზერბაიჯანს შორის მოლაპარაკებების პროცესზე მოსაზრებები გაცვალეს

სომხეთის პრემიერ-მინისტრმა ნიკოლ ფაშინიანმა და ევროკავშირის საგარეო საქმეთა და უსაფრთხოების პოლიტიკის საკითხებში უმაღლესმა წარმომადგენელმა კაია კალასმა ტირანაში შეხვედრისას აზრები გაცვალეს სომხეთსა და აზერბაიჯანს შორის მოლაპარაკებების პროცესთან დაკავშირებით და ხაზი გაუსვეს სამშვიდობო შეთანხმების ხელმოწერის მნიშვნელობას რეგიონში სტაბილურობისა და თანამშრომლობის სასარგებლოდ.

„არმენპრესის“ ინფორმაციით, სომხეთის პრემიერ-მინისტრის აპარატი იუწყება, რომ მხარეებმა განიხილეს სომხეთ-ევროკავშირს შორის თანამშრომლობის შემდგომი განვითარება და მიმდინარე დღის წესრიგის საკითხები.

მხარეებმა კმაყოფილება გამოთქვეს ურთიერთობების თანმიმდევრული განვითარების პროცესით და აღნიშნეს, რომ მაღალი დონის აქტიური კონტაქტები ახალ ბიძგს მისცემს ერთობლივ პროგრამებს.