სომხეთი სწორ გზაზეა։ არაიკ ჰარუთიუნიანმა საერთაშორისო ორგანიზაციის მიერ გამოქვეყნებულ მონაცემებზე მიუთითა

სომხეთის პრემიერ-მინისტრის აპარატის ხელმძღვანელმა არაიკ ჰარუთიუნიანმა კომენტარი გააკეთა საერთაშორისო ორგანიზაცია „რეპორტიორები საზღვრების გარეშე“-ს მიერ გამოქვეყნებულ მონაცემებზე, რომლის მიხედვითაც, 2025 წლის „მედიის თავისუფლების გლობალურ ინდექსში“ სომხეთმა გააუმჯობესა პოზიცია და დაიკავა 34-ე ადგილი 73.96 ქულით. ჰარუთიუნიანის თქმით, სომხეთი სწორ გზას ადგას.

„მედიის თავისუფლების გლობალურ ინდექსში სომხეთი ძალიან მაღალ, 34-ე ადგილზეა. რა თქმა უნდა, ამ ამბავს სათაურები კვლავ მანიპულაციური ექნება. მაგრამ რაც არ უნდა დაწერონ, ყოველ შემთხვევაში, ჩვენ მივდივართ უკიდურესად სწორ გზაზე, რისთვისაც გილოცავთ ყველას. ეს არის მაჩვენებელი, რომელზეც 20 წელიწადს მხოლოდ ოცნება შეიძლებოდა.

„რეპორტიორები საზღვრების გარეშე“ (RSF) ორგანიზაციამ გამოაქვეყნა 2025 წლის მედიის თავისუფლების გლობალური ინდექსი, რომელშიც სომხეთმა წინა წელთან შედარებით 9 პოზიციით გააუმჯობესა შედეგი.

სომხეთმა 180 ქვეყანას შორის 34-ე ადგილი დაიკავა. 2024 წელს სომხეთი 71.6 ქულით 43-ე ადგილზე იყო, ხოლო 2023 წელს 70.61 ქულით 49-ე ადგილზე იყო.

სომხეთი პრესის თავისუფლების მხრივ რეგიონში ლიდერია. საქართველო გასულ წელთან შედარებით 11 პოზიციით დაქვეითდა და 114-ე ადგილზეა, აზერბაიჯანი 167-ე ადგილზეა, თურქეთი 159-ე ადგილზეა, ირანი 176-ე ადგილზეა, რუსეთი გასულ წელთან შედარებით 9 პოზიციით დაქვეითდა და ახლა 171-ე ადგილზეა“, - „არმენპრესის“ ცნობით, ამის შესახებ სომხეთის რესპუბლიკის პრემიერ-მინისტრის აპარატის ხელმძღვანელმა „ფეისბუქის“ საკუთარ გვერდზე დაწერა.