აზერბაიჯანის შეიარაღებული ძალების ქვედანაყოფებმა ცეცხლი გახსნეს სიუნიქის ოლქის ხოზნავარის მიმართულებით
1 წუთი კითხვის
აზერბაიჯანის შეიარაღებული ძალების ქვედანაყოფებმა 20 აპრილს, დაახლოებით 02:30 საათზე, ცეცხლი გახსნეს სომხეთის სიუნიქის ოლქის ხოზნავარის მიმართულებით, რის შედეგადაც დაზიანდა სოფლის ერთ-ერთი საცხოვრებელი სახლის სახურავზე დამონტაჟებული მზის წყალგამაცხელებელი.
„არმენპრესის“ ინფორმაციით, ამის შესახებ განცხადებას ავრცელებს სომხეთის რესპუბლიკის თავდაცვის სამინისტრო.
დაშავებულები არ არიან.
„მოვუწოდებთ აზერბაიჯანის მხარეს, გამოძიება ჩაატაროს ხოზნავარის საცხოვრებელი სახლის დაცხრილვის ფაქტზე და გასცეს საჯარო განმარტებები.
გვსურს შეგახსენოთ, რომ სომხეთის რესპუბლიკის პრემიერ-მინისტრის აპარატმა წამოაყენა ინიციატივა, შეიქმნას სომხეთ-აზერბაიჯანის ერთობლივი მექანიზმი, რომელიც გამოიძიებს ცეცხლის შეწყვეტის რეჟიმის დარღვევის შემთხვევებს და/ან ინფორმაციას ამ დარღვევებზე, თუმცა აზერბაიჯანს დღემდე არ უპასუხია ამ ინიციატივაზე“, – ნათქვამია განცხადებაში.
შეგახსენებთ, რომ მანამდე აზერბაიჯანის შეიარაღებული ძალების ქვედანაყოფებმა ორჯერ გაუსწორეს მიზანი სიუნიქის ოლქის ხნაწახის დასახლებას, რის შედეგადაც დაზიანდა საცხოვრებელი სახლი და კულტურის ცენტრი.