სომხეთის რესპუბლიკის გენერალური კონსული და ჰალების გუბერნატორის მოადგილე სომხურ-სირიულ ურთიერთობათა გაფართოების შესაძლებლობებს განიხილავენ

ჰალების გუბერნატორის მოადგილე ალი ჰანნურანი და მისი ხელმძღვანელობით ჩამოსული დელეგაცია 10 მარტს ეწვივნენ ჰალებში სომხეთის რესპუბლიკის გენერალურ საკონსულოს.

„არმენპრესის“ ინფორმაციით, ამის შესახებ ჰალების „განდძასარის“ პერიოდული გამოცემა იტყობინება და განმარტავს, რომ ჰანნურანის ხელმძღვანელობით ჩამოსულ დელეგაციაში შედიოდნენ გუბერნატორის მრჩეველი ღასან ფარუჰი, ადმინისტრაციის ხელმძღვანელი აბდ ალ-მუნაიმ აზატიდინი, საგარეო და პოლიტიკური ურთიერთობების დეპარტამენტის უფროსი აჰმედ ბატაუი და საზოგადოებასთან ურთიერთობების დეპარტამენტის უფროსი იასერ მაულოი.

ცნობილია, რომ ორმხრივი გაცნობითი საუბრის დროს სომხეთის რესპუბლიკის გენერალურმა კონსულმა არა ავეტისიანმა ყურადღება გაამახვილა სომხურ-არაბულ ისტორიულ კავშირებზე, სომეხ და სირიელ ხალხებს შორის ტრადიციულად თბილ ურთიერთობებზე, რაც შეიძლება იქცეს ერებს შორის მეგობრობის კლასიკურ მაგალითად და დაეხმაროს ტოლერანტობის აღდგენაში.

„სტუმრებმა სრულად გაიზიარეს ეს მოსაზრებები და აღნიშნეს, რომ სირიის სომეხ მოქალაქეებს და სომხეთისადმი უდიდესი პატივისცემა და კეთილგანწყობა აქვთ, რაც მომავალშიც უნდა გაგრძელდეს“, – ნათქვამია გამოცემის მიერ გავრცელებულ ცნობაში.

გავრცელებული ინფორმაციის თანახმად, გენერალურმა კონსულმა ასევე წარმოადგინა თანამშრომლობის ფართო სპექტრი ყველა სფეროში, რომელიც ტრადიციულად არსებობს სომხეთსა და სირიას შორის, და აღნიშნა, რომ სომხეთი ყოველთვის მზად არის დაეხმაროს და ითანამშრომლოს სირიის მეგობარი ხალხის მიერ არჩეულ ხელისუფლებასთან.

გავრცელებული ცნობით, სომხეთის რესპუბლიკის გენერალურმა კონსულმა სტუმრებს გააცნო სომხეთის საგარეო საქმეთა მინისტრის მოადგილის, ვაჰან კოსტანიანის ახლახან დამასკოში განხორციელებული ვიზიტის შედეგები და მიღწეული შეთანხმებების შესრულების პროცესი.

„გენერალურმა კონსულმა ასევე სტუმრებს თავისი ხედვა გააცნო თანამშრომლობის საკითხებზე და მოისმინა მათი სურვილები და მოსაზრებები ამ მიმართულებით“, – აღნიშნულია ინფორმაციაში.

გავრცელებული ცნობით, ჰალების გუბერნატორის მოადგილემ მზადყოფნა გამოთქვა მხარი დაუჭიროს ჰალებში სომხეთის რესპუბლიკის გენერალური საკონსულოს საქმიანობას.

მხარეები შეთანხმდნენ, რომ მუდმივ კომუნიკაციაში იქნებიან.

„არა ავეტისიანმა თავისი თბილი მოკითხვა გადასცა გუბერნატორს და დაჰპირდა, რომ უახლოეს მომავალში მას პირადად ეწვევა“, – იტყობინება გამოცემა.