„ანორა“ – საუკეთესო ფილმი: ცნობილი გახდა „ოსკარის“ გამარჯვებულები

ლოს-ანჯელესში, Dolby Theatre-ში, ამერიკის კინოაკადემიის „ოსკარის“ 97-ე ცერემონია გაიმართა, სადაც დაჯილდოვდნენ 2024 წელს გამოშვებული ფილმები.

„არმენპრესის“ ცნობით, „ანორა“, რომელშიც ასევე მონაწილეობდნენ ვაჩე თოვმასიანი და კარენ კარაგულიანი, წლის მთავარი გამარჯვებული გახდა და 5 ჯილდო მოიპოვა, მათ შორის „საუკეთესო ფილმი“, „საუკეთესო მსახიობი ქალი“, „საუკეთესო რეჟისორი“, „საუკეთესო ორიგინალური სცენარი“ და „საუკეთესო მონტაჟი“.

„საუკეთესო ფილმის“ კატეგორიაში „ანორასთან“ ერთად ნომინირებული იყვნენ ბრედი ქორბეთის „ბრუტალისტი“, ჯეიმს მენგოლდის „ყველასთვის უცნობი“, ედუარდ ბერგერის „კონკლავი“. ამავე ჯილდოსთვის ასევე იბრძოდნენ „სუბსტანცია“, „ემილია პერესი“, „დიუნა: ნაწილი 2“, „მე ისევ აქ ვარ“, „ნიკელის ბიჭები“, „ბოროტება“.

„საუკეთესო მსახიობი კაცის“ ნომინაციაში გაიმარჯვა ედრიენ ბროუდიმ ფილმში „ბრუტალისტი“ შესრულებული როლისთვის. ამავე კატეგორიაში წარდგენილი იყვნენ ტიმოთი შალამე („ყველასთვის უცნობი“, ბობ დილანის როლისთვის), რალფ ფაინსი („კონკლავი“), სებასტიან სტენი („მოსწავლე“, დონალდ ტრამპის როლისათვის) და კოლმან დომინგო („სინგ-სინგ“).

„საუკეთესო მსახიობი ქალი“ გახდა მაიკი მედისონი („ანორა“). ამ ნომინაციაში ასევე წარდგენილი იყვნენ დემი მური („სუბსტანცია“), სინთია ერივო („ბოროტება“), კარლა სოფია გასკონი („ემილია პერესი“), ფერნანდა ტორესი („მე ისევ აქ ვარ“).

„საუკეთესო რეჟისორი“ გახდა შონ ბეიკერი („ანორა“). ამავე კატეგორიაში ნომინირებული იყვნენ ბრედი ქორბეტი („ბრუტალისტი“), კორალი ფარჯა („სუბსტანცია“), ჯეიმს მენგოლდი („ყველასთვის უცნობი“), ჟაკ ოდიარი („ემილია პერესი“).

„საუკეთესო მეორეხარისხოვანი მსახიობი კაცი“ გახდა კირან კალკინი („ნამდვილი ტკივილი“), ხოლო „საუკეთესო მეორეხარისხოვანი მსახიობი ქალი“ – ზოი სალდანა („ემილია პერესი“).

„საუკეთესო ორიგინალური სცენარი“ მიიღო ფილმმა „ანორა“, რომელიც ამ ნომინაციაში კონკურენციას უწევდა „ბრუტალისტს“, „ნამდვილი ტკივილი“, „5 სექტემბერი“ და „სუბსტანცია“ ფილმებს.

„საუკეთესო ადაპტირებული სცენარის“ ნომინაციაში გამარჯვებული გახდა „კონკლავი“, ხოლო ამავე კატეგორიაში ნომინირებული იყვნენ „ყველასთვის უცნობი“, „ემილია პერესი“, „ნიკელის ბიჭები“ და „სინგ-სინგ“.

„საუკეთესო უცხოენოვანი ფილმი“ გახდა „მე ისევ აქ ვარ“ (ბრაზილია). ამავე კატეგორიაში წარდგენილი იყვნენ „ნემსიანი გოგონა“ (დანია), „ემილია პერესი“ (საფრანგეთი), „წმინდა ლეღვის თესლი“ (გერმანია) და „დინება“ (ლატვია, ანიმაციური ფილმი).

„საუკეთესო ანიმაციური ფილმი“ გახდა „დინება“. ამ კატეგორიაში ასევე წარდგენილი იყვნენ „შეცბუნება 2“, „ლოკოკინას მოგონებები“, „უოლეს და გრომიტი: ყველაზე ველური შურისძიება“, „ველური რობოტი“.

„საუკეთესო საუნდტრეკი“ მიიღო ფილმმა „ბრუტალისტი“, ხოლო ნომინირებულნი იყვნენ „კონკლავი“, „ემილია პერესი“, „ბოროტება“, „ველური რობოტი“.