საგარეო საქმეთა მინისტრის მოადგილე დარწმუნებულია, რომ ევროკავშირში გაწევრიანების პროცესის დაწყების შესახებ სომხეთის გადაწყვეტილება არ არის მიმართული რუსეთის წინააღმდეგ

სომხეთის რესპუბლიკის საგარეო საქმეთა მინისტრის მოადგილე ვაჰან კოსტანიანი აცხადებს, რომ ერევნის მიერ გადადგმული ნაბიჯები არ არის მიმართული რომელიმე პარტნიორის წინააღმდეგ, და სომხეთი ინარჩუნებს და აგრძელებს დიალოგს ყველა პარტნიორთან, მათ შორის, რუსეთის ფედერაციასთან.

როგორც „არმენპრესი“ იუწყება, ამის შესახებ ვაჰან კოსტანიანმა მთავრობის სხდომის შემდეგ გამართულ ბრიფინგზე ისაუბრა, სადაც უპასუხა კითხვას, არის თუ არა ევროკავშირში გაწევრიანების პროცესის დაწყება რუსეთის წინააღმდეგ გადადგმული ნაბიჯი.

„სომხეთის რესპუბლიკის ნაბიჯები არ არის მიმართული რომელიმე პარტნიორის წინააღმდეგ. ჩვენ გვაქვს და ვაგრძელებთ დიალოგს ყველა პარტნიორთან, მათ შორის, რუსეთის ფედერაციასთან“, – აღნიშნა საგარეო საქმეთა მინისტრის მოადგილემ.

კოსტანიანმა ასევე შეახსენა, რომ რამდენიმე კვირის წინ სომხეთის საგარეო საქმეთა მინისტრი სამუშაო ვიზიტით იმყოფებოდა მოსკოვში და იქ რუსეთის საგარეო საქმეთა მინისტრ სერგეი ლავროვთან საკმაოდ კონსტრუქციული შეხვედრა ჰქონდა.

საგარეო საქმეთა მინისტრის მოადგილემ ასევე უპასუხა შეკითხვას, იგეგმება თუ არა უახლოეს მომავალში სომხეთის პრემიერ-მინისტრ ნიკოლ ფაშინიანის ვიზიტი მოსკოვში. კოსტანიანმა აღნიშნა, რომ ამ ეტაპზე დღის წესრიგში ასეთი საკითხი არ დგას.

„თუ ასეთი ვიზიტები დაიგეგმება, მთავრობის წარმომადგენლები შესაბამის დროს ოფიციალურ ინფორმაციას გაავრცელებენ. ამ ეტაპზე, მსგავსი საკითხი დღის წესრიგში არ დგას“, – განაცხადა კოსტანიანმა.

სომხეთის პარლამენტმა 12 თებერვალს პირველი მოსმენით მიიღო კანონის პროექტი, რომელიც ევროკავშირში გაწევრიანების პროცესის დაწყებას ეხება. პროექტს მხარი დაუჭირა 63-მა დეპუტატმა, 7 კი წინააღმდეგი წავიდა. ინიციატივას მხარი დაუჭირა მმართველმა ფრაქციამ „სამოქალაქო შეთანხმება“, ხოლო ოპოზიციურმა ფრაქციამ „პატივი მაქვს“ მის წინააღმდეგ მისცა ხმა. ოპოზიციური ფრაქცია „სომხეთი“ კენჭისყრაში არ მონაწილეობდა.