სომხეთი პროვოკაციებს არ აჰყვება და კონსტრუქციული განწყობით განაგრძობს მოლაპარაკებებს აზერბაიჯანთან: საგარეო საქმეთა მინისტრის მოადგილე

სომხეთი კვლავ ინარჩუნებს კონსტრუქციულ მიდგომას აზერბაიჯანთან მოლაპარაკებების პროცესში და იმედს გამოთქვამს, რომ ბაქო მოკლე დროში უპასუხებს ერევნის წინადადებებს.

როგორც „არმენპრესი“ იუწყება, ამის შესახებ სომხეთის მთავრობის სხდომის შემდეგ გამართულ ბრიფინგზე განაცხადა საგარეო საქმეთა მინისტრის მოადგილემ ვაჰან კოსტანიანმა.

მინისტრის მოადგილე არ ეთანხმება შეფასებას, რომ სომხეთ-აზერბაიჯანის მოლაპარაკებები ჩიხშია შესული.

„ყოველ შემთხვევაში, გაიმართა დელიმიტაციის კომისიების სხდომა, არსებობს შეთანხმება, რომ უახლოეს პერიოდში ახალი შეხვედრა უნდა ჩატარდეს“, – განაცხადა კოსტანიანმა.

სომხეთ-აზერბაიჯანის ურთიერთობების დარეგულირების შესახებ შეთანხმების განხილვასთან დაკავშირებით, საგარეო საქმეთა მინისტრის მოადგილემ აღნიშნა, რომ ერევანმა უკვე დიდი ხანია, რაც საკუთარი წინადადებები წარადგინა და ელოდება ბაქოს პასუხს.

„იმედი გვაქვს, რომ ამ წინადადებებზე პასუხს მოკლე დროში მივიღებთ, რათა პროცესი გაგრძელდეს. სომხეთი, როგორც ადრე, კვლავ კონსტრუქციულად არის ჩართული მოლაპარაკებებში“, – განაცხადა მან.

რაც შეეხება აზერბაიჯანის მხრიდან სომხეთის მიმართ მუდმივ მუქარებსა და აგრესიულ რიტორიკას, ვაჰან კოსტანიანმა აღნიშნა, რომ ასეთი განცხადებები მიზნად ისახავს რეგიონში დაძაბულობის ესკალაციას. „სომხეთი არ აჰყვება მსგავს პროვოკაციებს და მოლაპარაკებების პროცესში კონსტრუქციულ მიდგომას შეინარჩუნებს“, – განაცხადა საგარეო საქმეთა მინისტრის მოადგილემ.