ევროპარლამენტის წევრი ალიევის აგრესიულ განცხადებებს სომხეთის მიმართ ძალზე შემაშფოთებლად მიიჩნევს

ბრიუსელი, 9 იანვარი, არმენპრესი. ბელგიელი ევროპარლამენტარი გეროლფ ანემანსი შეშფოთებულია აზერბაიჯანის პრეზიდენტ ილჰამ ალიევის აგრესიული და მუქარის შემცველი განცხადებებით სომხეთის მიმართ.

ბრიუსელში „არმენპრესის“ კორესპონდენტთან ინტერვიუში, ევროპარლამენტარმა აღნიშნა, რომ ალიევის განცხადებები ნათლად ასახავს აზერბაიჯანის მთავრობის საშიშ მიდგომებს. მისი თქმით, ეს განცხადებები მოწმობს, რომ აზერბაიჯანს არ სურს გრძელვადიანი მშვიდობა.

ანემანსმა იმედი გამოთქვა, რომ შესაძლებელია სამართლიანი მშვიდობის შეთანხმება, რომელიც დაფუძნებული იქნება სომხეთის სუვერენიტეტისა და არწახის სომხური კულტურული მემკვიდრეობის პატივისცემაზე. „ჩვენ ასევე გვჯერა, რომ სომხეთი აკეთებს ყველაფერს მშვიდობის მხარდასაჭერად. ახლა კი საკითხი საერთაშორისო თანამეგობრობის და მინსკის ჯგუფის პასუხისმგებლობაზეა დამოკიდებული, რათა აიძულონ აზერბაიჯანი გადადგას რეალური ნაბიჯები მოლაპარაკებების მაგიდასთან“, - აღნიშნა ანემანსმა.

რაც შეეხება ალიევის მიერ წამოწეულ ე.წ. „დასავლეთ აზერბაიჯანის“ ნარატივს, ევროპარლამენტარმა განაცხადა, რომ ეს არაფერია, თუ არა ისტორიული ფაქტების დამახინჯება, რომელიც მიმართულია იმ ტერიტორიებზე პრეტენზიის გასამართლებლად, რომლებიც საერთაშორისო სამართლის თანახმად სომხეთის სუვერენიტეტის ქვეშ იმყოფება. „პრეზიდენტი ალიევი და მისი რეჟიმი არაერთხელ აცხადებდნენ მსგავს ტერიტორიულ პრეტენზიებს. ამ ნარატივის გამოყენებით, ისინი ამართლებენ არწახის ანექსიას და სომხეთის წინააღმდეგ შემდგომ სამხედრო აგრესიას. მათი მიზანია ეთნიკური სომხების მასობრივი გადასახლებით ჩაანაცვლონ როგორც არწახში, ისე იმ ტერიტორიებზე, რომლებსაც ისინი „დასავლეთ აზერბაიჯანს“ უწოდებენ“, - განაცხადა ევროპარლამენტარმა.

ანემანსმა გაიხსენა, რომ თურქეთისა და აზერბაიჯანის გეოპოლიტიკური მიზანია ერთმანეთთან პირდაპირი ტერიტორიული კავშირის უზრუნველყოფა, ხოლო სომხეთი, თავისი გეოგრაფიული მდებარეობის გამო, პირდაპირ დგას ამ გზაზე. „ალიევის ბოლო განცხადებები „ზანგეზურის დერეფნის“ შესახებ ძალიან მრავლისმთქმელი იყო ამ კონტექსტში: მან ღიად განაცხადა, რომ სურს ეს დერეფანი, რომელიც სომხეთის ტერიტორიაზე გადის, გამოიყენოს თურქეთსა და აზერბაიჯანს შორის კავშირის დასამყარებლად, რითაც არღვევს სომხეთის სუვერენიტეტსა და საერთაშორისო სამართალს“, - განაცხადა ანემანსმა.

ევროპარლამენტარის აზრით, ალიევის რეჟიმის რიტორიკის, იდეოლოგიისა და სტრატეგიული გეგმების გათვალისწინებით, სომხეთმა მაქსიმალურად უნდა უზრუნველყოს საკუთარი უსაფრთხოება.

საუბრისას სომხეთის მთავრობის მიერ წარდგენილ „მშვიდობის გზაჯვარედინი“ ინიციატივაზე, ევროპარლამენტარმა აღნიშნა, რომ ამ პროექტს დიდი პოტენციალი აქვს და ის მნიშვნელოვან წვლილს შეიტანს სამხრეთ კავკასიაში სტაბილურობის განმტკიცებაში. დეპუტატის თქმით, პროექტი დადებით გავლენას მოახდენს ეკონომიკური განვითარების და ვაჭრობის მხრივ სომხეთის, საქართველოს, თურქეთის, აზერბაიჯანისა და ირანის შორის.

„ეკონომიკური ასპექტი არანაკლებ მნიშვნელოვანია „მშვიდობის გზაჯვარედინის“ პროექტის დადებითი გავლენისა დიპლომატიური, კულტურული და პოლიტიკური კავშირების გაძლიერებაზე რეგიონში. ქვეყნებს შორის მზარდი ვაჭრობა და ტრანსპორტი ხელს შეუწყობს ურთიერთგაგებას და მშვიდობის დამყარებისთვის ხელსაყრელი პირობების შექმნას.

„მშვიდობის გზაჯვარედინის“ პროექტის ძირითადი პრინციპები რეგიონში თანასწორი ურთიერთობების იდეალური სტანდარტებს სთავაზობს,“ - დასძინა გეროლფ ანემანსმა. მისი თქმით, რა თქმა უნდა, „მშვიდობის გზაჯვარედინის“ პროექტთან დაკავშირებით არსებობს სერიოზული გამოწვევები, რომელთაგანაც მთავარი აზერბაიჯანისა და თურქეთის მხრიდან სტაბილური და ხანგრძლივი მშვიდობისთვის მუშაობის მზაობის ნაკლებობაა.