ბაქოდან ნაყიდი გაზი არ შეიძლება იყოს უფრო მნიშვნელოვანი, ვიდრე ადამიანის უფლებები։ ევროპარლამენტში განიხილეს სომეხი ტყვეების შესახებ სასწრაფო რეზოლუცია

ბრიუსელი, 13 მარტი, არმენპრესი։ ევროპის პარლამენტის 12 მარტის პლენარულ სხდომაზე სასწრაფო პროცედურის ფარგლებში განიხილეს რეზოლუცია, რომელიც შეეხება ბაქოში უკანონოდ დაკავებული სომეხი ტყვეების მიმართ ყალბ სასამართლო პროცესებს.

ბრიუსელში „არმენპრესის“ კორესპონდენტის ინფორმაციით, სომხეთის საკითხებზე მუდმივმა მომხსენებელმა და რეზოლუციის თანაავტორმა მირიამ ლექსმანმა თავის გამოსვლაში აღნიშნა, რომ ბაქოში მიმდინარე ფალსიფიცირებული სასამართლო პროცესები და ტყვეების არაადამიანური პირობები აჩვენებს ალიევის რეჟიმის ნამდვილ სახეს, რეჟიმს, რომელიც უგულებელყოფს საერთაშორისო ვალდებულებებს.

„მიუხედავად იმისა, რომ ევროკავშირი ცდილობს სტრატეგიული პარტნიორობის დამყარებას, ბაქოს რეჟიმი აგრძელებს მეზობლების დამუქრებას და ხელს უშლის რეგიონული მშვიდობის მიღწევის ძალისხმევას.

დღევანდელ გეოპოლიტიკურ გარემოში ევროკავშირის მხრიდან სასწრაფოდ აუცილებელია საკუთარი ღირებულებების დაცვა, განსაკუთრებით უშუალო სამეზობლოში. ამის ნაცვლად, ჩვენ კვლავ ვცდილობთ ავტორიტარიზმის დაკმაყოფილებას და ალიევის ქმედებების წახალისებას ვაჭრობის გაფართოებით. განა არაგვაქვს ისტორიისგან ნასწავლი გაკვეთილები? დროა შევწყვიტოთ სტრატეგიული პარტნიორობის ილუზია, გავუსწოროთ თვალი რეალობას და ვიმოქმედოთ ჩვენი ღირებულებებისა და პრინციპების შესაბამისად“, – განაცხადა მირიამ ლექსმანმა.

სომხეთის საკითხებზე მომხსენებელმა და რეზოლუციის თანაავტორმა ვასილე დინკუმ თავის გამოსვლაში აღნიშნა, რომ სომეხი პოლიტიკური პატიმრების მდგომარეობა დიდ კითხვის ნიშანს სვამს კავკასიის ამ ნაწილში სამართლის, სტაბილურობისა და მშვიდობის საკითხებში. მან გაიხსენა, რომ ევროპის პარლამენტი არასდროს გადაუხვევია თავის პრინციპებს სომხეთის სუვერენიტეტისა და დამოუკიდებლობის საკითხებში.

„ჩვენ გვინდა ვიყოთ ამ პროცესების ნაწილი და მხარი დავუჭიროთ იმ შესაძლო სანქციებს, რომლებიც მიმართული იქნება იმ აზერბაიჯანელი ოფიციალური პირების წინააღმდეგ, რომლებიც განახორციელებენ სასამართლო რეპრესიებს. ჩვენ უნდა გამოვიყენოთ მკაცრი სანქციები და ხელი შევუწყოთ მსგავსი დარღვევების პრევენციას. მომავალი არ გამოიყურება იმედის მომცემი. რეგიონში არსებული სამხედრო ვითარების გათვალისწინებით, ახლა უნდა ვიმოქმედოთ და მივიღოთ კონკრეტული ზომები, რათა თავიდან ავიცილოთ მომავალი ტრაგედიები“, – განაცხადა ევროპარლამენტარმა.

რეზოლუციის თანაავტორმა, სომხეთის საკითხებზე მომხსენებელმა ნატალი ლუაზომ თავის გამოსვლაში აღნიშნა, რომ ბაქოში მიმდინარე სასამართლო პროცესები არაფრით განსხვავდება სტალინური რეპრესიების პროცესებისგან და რომ ტყვეების ერთადერთი „დანაშაული“ მათი სომხობაა. ლუაზომ ევროკავშირის უმაღლეს წარმომადგენელს კაია კალასს მიმართა და აღნიშნა, რომ ის კვლავ არ ესწრება პლენარულ სხდომას და არ უსმენს ევროპარლამენტარებს. მან კაია კალასს მოუწოდა, ჩავიდეს სომხეთში და ადგილზე ნახოს ქვეყანა, რომელიც მშვიდობას ესწრაფვის და ევროპაზე ოცნებობს. ევროპარლამენტარმა მოუწოდა ევროკავშირს, გააკეთოს ის, რასაც უკვე დიდი ხანია ითხოვს ევროპარლამენტი.

ყველა პოლიტიკური ჯგუფის წარმომადგენელმა ათზე მეტმა ევროპარლამენტარმა მკაცრი პოზიცია დააფიქსირა, მოუწოდა აზერბაიჯანის პასუხისმგებლობის აღებას და სანქციების დაწესებას, ხოლო არსებულ პოლიტიკურ ვითარებას სამარცხვინო უწოდა.

პარლამენტარებმა გაიხსენეს, რომ ბაქოდან ნაყიდი გაზი ვერ იქნება უფრო მნიშვნელოვანი, ვიდრე ადამიანის უფლებები და ევროპული ღირებულებები, განსაკუთრებით იმ ფონზე, რომ არავითარი განსხვავება არ არის რუსულ და აზერბაიჯანულ გაზს შორის.

განხილვის ბოლოს სიტყვით გამოვიდა ევროკომისიის კომისარი დან იორგენსენი.

„ევროკომისია აკვირდება მთიანი ყარაბაღიდან 16 სომეხი ბრალდებულის წინააღმდეგ მიმდინარე სასამართლო პროცესებს, რომლებიც 2024 წლის 17 იანვარს დაიწყო ბაქოს სამხედრო სასამართლოში. ჩვენ ვაცნობიერებთ, რომ ადამიანის უფლებათა დაცვის ორგანიზაციები შეშფოთებას გამოთქვამენ ამ სასამართლო პროცესების სამართლიანობასა და ბრალდებულების მიმართ მოპყრობის შესახებ. თქვენგანაც იგივე შეშფოთება გვესმის, და დღეს ამ საკითხს ძალიან სერიოზულად ვეკიდებით, ვაკვირდებით პროცესს. სამართლიანი სასამართლოს უფლება უნდა იყოს უზრუნველყოფილი და დაცული. ევროკავშირის სპეციალური წარმომადგენელი სამხრეთ კავკასიაში ასევე ყურადღებით ადევნებს თვალს ამ საკითხს და ჩვენს შეშფოთებას ბაქოს ხელისუფლებას გადასცემს“, – განაცხადა კომისარმა იორგენსენმა.

მან აღნიშნა, რომ ევროკავშირი განაგრძობს აზერბაიჯანის მთავრობის მოწოდებას, შეასრულოს საერთაშორისო ვალდებულებები, მათ შორის სამართლიანი სასამართლოს უფლების დაცვა.

„ჩვენ გამოვიყენებთ ყველა შესაძლო საშუალებას, რათა აზერბაიჯანი ვალდებული იყოს უზრუნველყოს დაკავებულთა ღირსეული და უსაფრთხო პირობები.

წამების და არაადამიანური მოპყრობის შესახებ ანგარიშები უნდა იყოს დაუყოვნებლივ და ობიექტურად გამოძიებული“, – დასძინა იორგენსენმა.

ევროკომისარმა აღნიშნა, რომ ევროკავშირი გააგრძელებს მხარეების მხარდაჭერას, რათა მათ სრულფასოვანი ურთიერთობების დარეგულირების გზაზე წინსვლა შეძლონ.

„ევროკავშირი გააგრძელებს ამ პროცესის მხარდაჭერას ჩვენი ყველა ხელთ არსებული ინსტრუმენტის გამოყენებით.

ჩვენ მზად ვართ, მხარი დავუჭიროთ მხარეებს დიალოგში, რომელიც მიმართული იქნება ხანგრძლივი და მდგრადი მშვიდობისკენ,“ – დაასკვნა დან იორგენსენმა.

სასწრაფო პროცედურის ფარგლებში წარმოდგენილი რეზოლუცია კენჭისყრაზე დღეს, 13 მარტს დადგება.