რამდენიმე მაღალჩინოსანს ვთხოვე დაკავებული თანამდებობის დატოვება: სომხეთის პრემიერ-მინისტრი
2 წუთი კითხვის
ერევანი, 18 ნოემბერი, არმენპრესი․ სომხეთის რესპუბლიკის პრემიერ-მინისტრმა ნიკოლ ფაშინიანმა „ფეისბუქზე“ პოსტის საშუალებით აცნობა, რომ რამდენიმე მაღალჩინოსანს თანამდებობის დატოვება სთხოვა.
„ძვირფასო თანამემამულეებო, მედიასა და სოციალურ ქსელებში გავრცელებული მასშტაბური განხილვების გათვალისწინებით, საჭიროდ მივიჩნევ გაცნობოთ, რომ რამდენიმე მაღალჩინოსანს ვთხოვე დაკავებული თანამდებობის დატოვება.
ასეთი თხოვნის მიზეზები პერსონალურ ხასიათს არ ატარებს, არამედ სისტემურია, რის შესახებაც საჯაროდ არაერთხელ მისაუბრია.
ამავე დროს, ვერ უარვყოფ აღნიშნული კოლეგების წვლილს ჩვენი სახელმწიფოების განვითარების საქმეში და მადლობას ვუხდი მათ გაწეული სამუშაოსთვის და ჩემი თხოვნის გაგებისთვის“, - დაწერა პრემიერ-მინისტრმა, „არმენპრესის“ ცნობით.
მედიაში გუშინდლიდან ვრცელდება ინფორმაცია სომხეთის მთავრობაში საკადრო სერიოზული ცვლილებების შესახებ. 18 ნოემბერს თანამდებობიდან გადადგომის შესახებ უზენაესი სასამართლოს საბჭოს თავმჯდომარე კარენ ანდრეასიანმა განაცხადა. ანტიკორუფციული კომიტეტიდანაც დაადასტურეს, რომ გათავისუფლების განცხადება დაწერა კომიტეტის თავმჯდომარემ სასუნ ხაჩატრიანმა.
გავრცელებული ინფორმაციით, გადადგომის განცხადებები ასევე შეიტანეს ტერიტორიული მართვისა და ინფრასტრუქტურების მინისტრმა გნელ სანოსიანმა, სახელმწიფო შემოსავლების კომიტეტის თავმჯდომარემ რუსტამ ბადასიანმა და შინაგან საქმეთა მინისტრმა ვაჰე ღაზარიანმა.