სომხური ღვინოები წარმოდგენილი იყო ლონდონსა და მანჩესტერში

ერევანი, 14 ოქტომბერი, არმენპრესი. სომხური ღვინის ბრენდის პოპულარიზაციის მნიშვნელობის გათვალისწინებით, სომხეთის მევენახეობისა და მეღვინეობის ფონდი, ბრიტანული IWSC (International Wine and Spirit Competition) საერთაშორისო კონკურსის ორგანიზატორებთან თანამშრომლობის ფარგლებში და ამერიკის შეერთებული შტატების საერთაშორისო განვითარების სააგენტოს (USAID) მხარდაჭერით, დიდი ბრიტანეთისა და ჩრდილოეთ ირლანდიის გაერთიანებულ სამეფოში ორგანიზება გაუკეთა სომხური ღვინის ცნობადობის ამაღლებისკენ მიმართულ ღონისძიებებს. „არმენპრესის“ ცნობით, ამის შესახებ ინფორმაციას სომხეთის მევენახეობისა და მეღვინეობის ფონდი ავრცელებს.

სომხური ღვინოების პოპულარიზაციის კამპანია დაიწყო ქალაქ მანჩესტერიდან. სომხური მევენახეობა-მეღვინეობის ფონდის აღმასრულებელი დირექტორი ზარუჰი მურადიანი მიესალმა დამსწრეებს და მადლობა გადაუხადა სომხური ღვინოებით დაინტერესებისთვის.

ცნობილი ღვინის ოსტატის, კეროლაინ გილბის, წარდგინებით, სომხეთის 30-მდე მეღვინეობის კომპანიის 68-ზე მეტი ღვინო წარმოდგენილი იყო 7 ოქტომბერს მანჩესტერის სომელიეთა კლუბში ჩრდილოეთ სომელიეთა კლუბთან თანამშრომლობის ფარგლებში.

მანჩესტერში ისაუბრეს სომხეთის მეღვინეობის რეგიონებზე, ღვინის სტილზე და თავისებურებებზე, ვაზის ჯიშებზე, ასევე სომხეთის კულტურასა და ისტორიაზე.

ლონდონში ბრიტანელმა ღვინის მყიდველებმა და ჟურნალისტებმა 9 ოქტომბერს დააგემოვნეს სომხური 30 მეღვინეობის კომპანიის 68-ზე მეტი სახეობის ღვინო და გაეცნენ აღორძინებული მეღვინეობის ქვეყნის ისტორიას.

ლონდონის ღონისძიებაში მონაწილეობა მიიღო დიდ ბრიტანეთში სომხეთის ელჩმა ვარუჟან ნერსესიანმა, რომელმაც თავის მისასალმებელ სიტყვაში აღნიშნა ასეთი ღონისძიების ორგანიზების მნიშვნელობა სომხური ღვინოების ბრიტანულ საზოგადოებაში პოპულარიზაციის თვალსაზრისით. ელჩმა აღნიშნა, რომ სომხეთში მეღვინეობა სწრაფად ვითარდება და, თავისი მრავალსაუკუნოვანი ისტორიის მქონე, იპყრობს ახალ-ახალ ბაზრებს. ნერსესიანმა იმედი გამოთქვა, რომ ასეთი ღონისძიებების მეშვეობით შესაძლებელი იქნება სომხური ღვინის ექსპორტის გაზრდა გაერთიანებულ სამეფოში.

დეგუსტაციების გარდა, ასევე ჩატარდა მრგვალი მაგიდის დისკუსიები სომხური ღვინოების პოტენციალისა და პერსპექტივების შესახებ, რაც უნიკალური შესაძლებლობაა სომხური ღვინის ბრიტანულ ბაზარზე გაყიდვის, ფასების დადგენის, მარკეტინგისა და ახალი კავშირების შექმნისთვის.