ჩვენი მიზანია ვაცნობოთ ქართველებს, რომ სომხეთი მშვენიერი ქვეყანაა: ქართული ტურისტული კომპანიის დირექტორი

ერევანი, 1 ივლისი, არმენპრესი. სომხები ხშირად მოდიან საქართველოში დასასვენებლად ან უბრალოდ სასიამოვნო დროის გასატარებლად, მაგრამ სომხეთი ჯერ კიდევ არ არის მიმზიდველი ტურისტული მიმართულება ქართველებისთვის. სიტუაციის შეცვლის ეფექტური გზა შეიძლება იყოს მეზობელი ქვეყნის ისტორიის, კულტურის, სამზარეულოსა და ტურისტული შესაძლებლობების შესახებ ინფორმირებულობის გაზრდა. ამ მიმართულებით ნაბიჯების გადადგმისა და სომეხ კოლეგებთან თანამშრომლობის განვითარების განზრახვის შესახებ „არმენპრესის“ კორესპონდენტს აცნობა ერევანში სომხურ-ქართული ტურისტული ბიზნეს ფორუმში მონაწილე Discover Georgia ტურისტული კომპანიის დირექტორმა ნინა კეკელიძემ.

- რამდენად ეფექტური იყო ეს კონფერენცია?

წელს მეორედ ვმონაწილეობთ ასეთ ღონისძიებაში სომხეთში. ძალიან საინტერესოა ჩვენს ქვეყნებს შორის ტურიზმის სფეროში თანამშრომლობის პერსპექტივების განხილვა. ვფიქრობ, რომ ერევანსა და დილიჟანში გატარებული სამი დღე ძალიან ეფექტური იყო თანამშრომლობის დეტალების განხილვის თვალსაზრისით. სავარაუდოდ, ერთობლივი პაკეტების შემუშავება შეიძლება სხვა ქვეყნების ტურისტებს მოეწონოს და დადებითად აისახოს დარგის განვითარებაზე. ძალიან მნიშვნელოვანია, რომ გამოვყავით და სისტემატიზაცია გავუკეთეთ ყველა არსებულ პრობლემას, რომლებიც დაკავშირებულია გიდების მუშაობასთან, ტურისტების გადაყვანასთან, სასტუმროებთან და ა.შ. ამ პრობლემების გადაჭრა საშუალებას მოგვცემს შევიმუშაოთ და ვაწარმოოთ საინტერესო შემოთავაზებები. ძალიან მადლობელი ვართ ამ პროგრამის ყველა ორგანიზატორისა და მონაწილისთვის ეფექტური დისკუსიების შესაძლებლობისთვის.

- მოახერხეთ შეთანხმებების მიღწევა?

მანამდე უკვე გვქონდა ხელშეკრულებები, ხორციელდებოდა ტურისტების შერწყმული ვიზიტები სომხეთსა და საქართველოში. წელს პროცესში ჩავრთეთ ახალი ტუროპერატორები, ამიტომ იქნება ახალი ხელშეკრულებები, ტურისტული პაკეტები და დავიწყებთ ერთობლივად მუშაობას.
ვგეგმავთ კონტრაქტის დადებას ერთი ტუროპერატორისთან, რომელიც სექტემბერში კონცერტებს აწყობს ერევანში. გვინდა ბევრი ტურისტი წამოვიდეს კონცერტზე საქართველოდან. სამშობლოში დაბრუნების შემდეგ ეს ყველაფერი ოფიციალურად გაფორმდება.

- არის თუ არა სომხეთი ტურიზმის მიმზიდველი მიმართულება საქართველოს მცხოვრებლებისთვის? 

სამწუხაროდ, ქართველები ხშირად არ სტუმრობენ სომხეთს. ჩვენი მიზანია მათ აცნობოთ, რომ სომხეთი შესანიშნავი ქვეყანაა, აქვს საინტერესო და მიმზიდველი ადგილები, შესანიშნავი ისტორია, კულტურა, სამზარეულო. ეს ყველაფერი ხელს შეუწყობს სომხეთისადმი ქართველი ტურისტების ინტერესის ზრდას და ვიზიტების რაოდენობის გაზრდას.

- შეგიძლიათ დაასახელოთ მთავარი პრობლემები, რომლებიც ხელს უშლის ტურიზმის განვითარებას სომხეთსა და საქართველოს შორის?

მთავარი საკითხი მომსახურების ხარისხია: ადამიანების გადაყვანის ორგანიზება, ინფრასტრუქტურა, მომსახურება. საჭიროა კომფორტული პირობების შექმნა ტურისტებისთვის, რათა არ წარმოიშვას პრობლემები და გაუგებრობები. სწორედ ამ მიზნით განვიხილავთ თანამშრომლობის ყველა დეტალს. ერთ მაგალითს მოვიყვან. ჩვენს წინა შეხვედრაზე სომხეთისა და საქართველოს მოქალაქეებს ჯერ კიდევ არ ჰქონდათ ორი ქვეყნის საზღვრის ID ბარათით გადაკვეთის შესაძლებლობა. ეს ღონისძიების შემდეგ შემოიღეს. წელს უკვე განვიხილავთ ტურისტული ნაკადების გაზრდის და მომსახურების ხარისხის გაუმჯობესების საკითხებს და სხვა პრობლემებს. ვიმუშავებთ საქართველოს ტურიზმის ასოციაციასთან და სომხეთის ტურიზმის ფედერაციასთან ამ პროექტების განხორციელების მიზნით.