368.59
1 րոպեի ընթերցում
Երևանի պարեկներն օրերս հայտնաբերել են ավելի քան 150 փաթեթ թմրանյութ։ «Արմենպրես»-ի փոխանցմամբ՝ այս մասին հայտնում են Ոստիկանությունից՝ ներկայացնելով մանրամասներ։
«Մայրաքաղաքի պարեկները ծառայություն իրականացնելիս Լուկաշինի փողոցում նկատել են «Նիսան» մակնիշի ավտոմեքենայի վարորդի և ուղևորի կասկածելի վարքը. պարեկներին տեսնելուն պես ուղևորը մեքենայից նետել է պոլիէթիլենային տոպրակ, որում կային կպչուն ժապավենով տասնյակ փաթեթներ։
Ժամը 01.45-ին, Լուկաշինի փողոցի հետնամասում, թմրամիջոցներ իրացնելու կասկածանքով պարեկները ձերբակալել և Համայնքային ոստիկանության Մաշտոցի բաժին են ներկայացրել Էջմիածնի բնակիչ 25-ամյա ուղևորին և Գորիսի բնակիչ 32-ամյա վարորդին:
Պարզվել է, որ տոպրակում կա ավելի քան 150 փաթեթ։
Վարորդը հայտնել է, որ փաթեթներում մարիխուանա տեսակի թմրամիջոց է»,-նշված է Ոստիկանության տարածած հաղորդագրության մեջ։
Կազմված փաստաթղթերն ուղարկվել են քննչական բաժին: Հանգամանքները պարզվում են: