«Կայուն դպրոցական սնունդ» ծրագիրը կընդլայնվի
2 րոպեի ընթերցում
![«Կայուն դպրոցական սնունդ» ծրագիրը կընդլայնվի](http://armenpress.am/resized/480/static/news/b/2019/12/998788.jpg)
ԵՐԵՎԱՆ, 13 ԴԵԿՏԵՄԲԵՐԻ, ԱՐՄԵՆՊՐԵՍ: «Կայուն դպրոցական սնունդ» ծրագրի շրջանակում սննդով ապահովվում են Հայաստանի բոլոր մարզերի տարրական դասարանի աշակերտները՝ բացի Երևանից:
Ինչպես «Արմենպրես»-ի մամուլի սրահում հրավիրված ասուլիսում նշեց ՀՀ կրթության, գիտության, մշակույթի և սպորտի նախարարի տեղակալ Արևիկ Անափիոսյանը, «Կայուն դպրոցական սնունդ» ծրագիրն ունի երկու բաղադրիչ՝ մեկն իրականացվում է ազգային ծրագրի մակարդակով, մյուսը՝ Պարենի համաշխարհային ծրագրի միջոցով:
«Դա միտված է երեխաների համար ճիշտ սննդակարգ ապահովելուն, ինչը նպաստում է դասերի ընթացքում առավել կենտրոնացմանը, ուղեղի զարգացմանը: Մենք ունենք հետազոտություն՝ ըստ որի, այն երեխաները, որոնք ունենում են ճիշտ սննդակարգով նախաճաշ, ավելի լավ կրթական արդյունք են դրսևորում, քան մյուս երեխաները»,- ասաց նախարարի տեղակալը:
Նախարարությունը նպատակ ունի ամբողջությամբ անցում կատարել ազգային ծրագրին. դա նշանակում է, որ Հայաստանի բոլոր մարզերի առաջինից երրորդ դասարանի երեխաների սննդի համար վճարելու է պետությունը: Այս գործընթացն իրենից ենթադրում է նաև դպրոցների խոհանոցների վերանորոգում, համապատասխան սարքավորումներով հագեցում, խոհարարների վերապատրաստում: Ծրագիր է մշակվելու Երևանում ևս նման աշխատանքներ իրականացնելու ուղղությամբ: Հեռահար նպատակներն այն են, որ դպրոցների հարևանությամբ լինեն փոքրիկ այգիներ, որի բերքը հնարավոր լինի օգտագործել դպրոցական սնունդը ապահովելու նպատակով: Ներկայում քննարկումներ են ընթանում ՄԱԿ-ի գործընկերների հետ: