Նախարարը պարզաբանեց բուհերից Հայոց լեզվի, գրականության և պատմության դասավանդումը հանելու հարցը
2 րոպեի ընթերցում
![Նախարարը պարզաբանեց բուհերից Հայոց լեզվի, գրականության և պատմության դասավանդումը հանելու հարցը](http://armenpress.am/resized/480/static/news/b/2019/10/992661.jpg)
ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանյան բուհերում Հայոց լեզվի, Հայ գրականության և Հայոց պատմության առարկաների դասավանդումը ոչ թե հանվելու է, այլ կրելու է հայեցողական բնույթ: «Արմենպրես»-ի հաղորդմամբ՝ այս մասին խորհրդարանում կառավարության անդամների հետ հարց ու պատասխանի ժամանակ ասաց ՀՀ կրթության, գիտության, մշակույթի և սպորտի նախարար Արայիկ Հարությունյանը՝ պատասխանելով «Բարգավաճ Հայաստան» խմբակցության պատգամավոր Սերգեյ Բագրատյանի հարցին:
Նախարար Հարությունյանը նախ նշեց, որ հարցը քննարկվում է:
«Դրանք ծրագրից չեն հանվում, խոսքը պարզապես դրանց պարտադիր ուսուցման բնույթի մասին է: Ընդհանուր տրամաբանությունն այն է, որ մեր աշակերտները 12-ամյա կրթության ժամանակ բավարար գիտելիք են ստանում և հայոց լեզվից, և հայ գրականությունից, և պատմությունից: Եվ, ըստ էության, ծրագրերի մեծ մասում դրանց կրկնությունը ազդում է մասնագիտական ծրագրի բովանդակության և որակի վրա»,-ասաց Հարությունյանը:
Նա շեշտեց՝ այդ հարցը վաղուց է քննարկվել: Բուհերն իրենց հայեցողությամբ կարող են այդ առարկաները ներառել ծրագրում: Նախարարը վստահություն հայտնեց, որ շատ բուհեր կներառեն, սակայն այդ առարկաների դասավանդումը պարտադիր բնույթ չի կրի: Հարությունյանը շեշտեց՝ հաճախ մասնագիտական ֆակուլտետներում դժգոհում են, որ ուսանողները շատ ավելի ժամանակ են կորցնում պարտադիր առարկաների վրա, որոնք անցնում են դպրոցներում և մասնագիտականին քիչ ժամանակ է մնում: