Պարոնյանի թատրոնում հոկտեմբերի 14-ին տեղի կունենա «Շահանե. պոետի գաղտնիքը» մոնոներկայացման պրեմիերան
2 րոպեի ընթերցում
ԵՐԵՎԱՆ, 12 ՀՈԿՏԵՄԲԵՐԻ, ԱՐՄԵՆՊՐԵՍ: Հ. Պարոնյանի անվան երաժշտական կոմեդիայի պետական թատրոնում պրեմիերա է. հոկտեմբերի 14-ից սկսած երեք օր հանդիսատեսին կներկայացվի «Շահանե. պոետի գաղտնիքը» մոնոներկայացումը: Բեմադրիչը բեմադրիչ Կարո Բալյանն է, դերասանուհին՝ Տատա Խաչատրյանի՝ Սանկտ Պետերբուրգից: «Արմենպրես»-ի մամուլի սրահում հրավիրված ասուլիսում Տատա Խաչատրյանը նշեց, որ այս ներկայացման հետ կապված Կարո Բալյանի հետ համագործակցությունը սկսվել է ամիսներ առաջ: Եղավ գաղափար բեմադրել այնպիսի ներկայացում, որ հետաքրքիր կլինի ինչպես Հայաստանի, այնպես էլ Ռուսաստանի հանդիսատեսի համար:
«Առաջարկ եղավ անդրադառնալ Եսենինի «Շահանե, օ դու իմ Շահանե» ստեղծագործությանը, ընդհանրապես հանդիսատեսին ներկայացնել Շահանե Տալյանի պատմությունը, ում մասին քիչ է խոսվում, ում մասին քիչ անդրադարձ կա ռուս շրջանակում: Նույնիսկ կան փորձեր Շահանեին ներկայացնել որպես այլ ազգի ներկայացուցիչ: Ահա այս ներկայացմամբ մենք ցույց ենք տալիս իրականը»,-ասաց Տատա Խաչատրյանը:
Սերգեյ Եսենինի մուսայի՝ Շահանե Տալյանի պատմությունը լի էր երջանկություն գտնելու հույսով և ազատության ձգտումով: Տատա Խաչատրյանն իր խաղով, փորձում է կենդանացնել եսենինյան պոետիկ հերոսուհուն:
Ներկայացման գաղափարը ծնվելուց հետո, որոշվեց սցենարի հարցում համագործակցել Կարինե Խոդիկյանի հետ: Բեմադրիչ Կարո Բալյանը նշեց, որ մինչ սցենարը գրվում էր, ինքն իր մտքում պատկերացնում էր, թե ինչպիսի պետք է լինի ներկայացումը:
«Երբ սցենարն ամբողջությամբ պատրաստ էր, որոշ բաներ փոխվեցին, ես իմ պատկերացումները նաև մտցրեցի: Շատ շնորհակալ եմ Կարինե Խոդիկյանին, նա մեզ շատ օգնեց արխիվային փաստաթղթերով, այս ընթացքում հետաքրքիր բացահայտումներ եղան կերպարի մասին»,-ասաց Կարո Բալյանը:
Երևանից բացի ներկայացումը դիտելու հնարավորություն կունենան Ռուսաստանում: Այդ նպատակով հիմա մի քանի թատրոնների հետ պայմանավորվածություններ են ձեռք բերվում: Աշխատանք է տարվում նաև ներկայացմամբ փառատոններին մասնակցելու ուղղությամբ: