2 րոպեի ընթերցում
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի նոր հակակոռուպցիոն ռազմավարության շրջանակում նախատեսվում է ստեղծել հակակոռուպցիոն մարմնի տարանջատված մոդել՝ Կոռուպցիայի կանխարգելման հանձնաժողովի և Հակակոռուպցիոն կոմիտեի տեսքով։ Այդ մասին կառավարության նիստում հայտարարեց Արդարադատության նախարար Ռուստամ Բադասյանը:
«Ամբողջությամբ վերանայվում է իրավապահ համակարգը՝ հետագայում այն առավել մասնագիտացված ու արդյունավետ դարձնելու միտումով։ Մասնավորապես, ըստ նախարարի, նախատեսվում է, որ 2021 թվականին ստեղծվելու է հակոկոռուպցիոն հանցագործությունների բացահայտման և քննության իրավասության միասնական մարմին՝ Հակակոռուպցիոն կոմիտե անվանմամբ։ Նախագծով նախատեսվում է, որ մի շարք քննչական վարչություններ միավորվելու են, և 2021 թվականի դրությամբ ունենալու ենք երեք քննչական մարմին՝ Հատուկ քննչական ծառայություն, Քննչական կոմիտե, իսկ Հակակոռուպցիոն կոմիտեն կլինի հիմնական մասնագիտացված մարմինը, որը կքննի կոռուպցիոն բնույթի հանցագործությունները»,- «Արմենպրես»-ի հաղորդմամբ, ասաց նախարարը:
Բադասյանի խոսքով՝ սահմանվել է երեք տարվա անցումային շրջան, որի ընթացքում Ազգային անվտանգության ծառայության օպերատիվ հատվածը շարունակելու է զբաղվել կոռուպցիոն բնույթի հանցագործությունների բացահայտմամբ, իսկ Հատուկ քննչական ծառայությունը կամ Քննչական կոմիտեն առանձին դեպքերում կարող են քննել կոռուպցիոն հանցագործությունները՝ մինչև Հակակոռուպցիոն կոմիտեի վերջնական ձևավորումը։
Նախատեսվում է նաև Գլխավոր դատախազության կազմում ստեղծել ստորաբաժանում՝ հակոկոռուպցիոն գործերով քննությունների նկատմամբ վերահսկողության նպատակով։
Նախարարը հավելեց, որ կարևորվում է նաև մասնագիտացված հակակոռուպցիոն դատարանի ստեղծումը։
Նախատեսվում է ամբողջությամբ բարեփոխել հայտարարագրման կարգը։